सप्तरीमा ट्र्याक्टरमा मोटरसाइकल ठोक्किँदा २ जनाको मृत्यु, १ गम्भीर घाइते

राजविराज । सप्तरी जिल्लाको राजगढ गाउँपालिका-५ मलेखपुरस्थित हुलाकी सडक खण्डमा ट्रयाक्टर र मोटरसाइकल एक आपसमा ठोक्किँदा दुई जनाको मृत्यु भएको छ भने एक जना गम्भीर घाइते भएका छन् ।

दुर्घटना आज दिउँसो अन्दाजी २:३५ बजे भएको हो । पत्थरगाढाबाट राजविराजतर्फ गइरहेको इँटा लोड गरिएको स १ त ५४४२ नम्बरको ट्रयाक्टरको पछाडिको भागमा विपरीत दिशाबाट आइरहेको म.प्र. ०२-०१९ प ९६२६ नम्बरको मोटरसाइकल ठोक्किएको प्रहरीले जनाएको छ।

मोटरसाइकलमा सवार तीनै जना घाइते भएका थिए । घाइतेमध्ये विष्णुपुर गाउँपालिका -१ जमुनी मधेपुराका १९ वर्षीय सन्तोष यादव र २२ वर्षीय सागर मण्डलको मृत्यु भएको छ । घटनामा सोही स्थानका १८ वर्षीय धनञ्जय यादवको अवस्था गम्भीर छ । उनलाई थप उपचारका लागि विराटनगर पठाइएको छ ।