उपनिर्वाचनको सम्भावना बढ्दा आयोगद्वारा मतदाता नाम दर्ता गर्न आग्रह

काठमाडौँ । निर्वाचन आयोग नेपालले आगामी दिनमा उपनिर्वाचनको सम्भावना बढेको जनाउँदै सबै नागरिकलाई समयमै मतदाता नामावलीमा नाम दर्ता गर्न आग्रह गरेको छ ।

२०७९ सालमा सम्पन्न विभिन्न तहका निर्वाचनपछि केही पदहरू विविध कारणले रिक्त रहँदा भविष्यमा उपनिर्वाचन आवश्यक हुनसक्ने आयोगको भनाइ छ । त्यसलाई मध्यनजर गर्दै आयोगले नागरिकलाई समयमै नाम दर्ता गराउन आग्रह गर्दै सूचना जारी गरेको हो ।

मतदाता नामावली ऐन, २०७३ को दफा ७ को उपदफा (२) को खण्ड (र) अनुसार निर्वाचन मिति घोषणा भइसकेपछि त्यस निर्वाचनका लागि नाम थप गर्न पाइँदैन। त्यसैले आगामी निर्वाचनमा मतदान गर्न चाहने नागरिकले निर्वाचन मिति घोषणा हुनुअघि नै आफ्नो नाम दर्ता गराइसक्नुपर्नेछ ।

निर्वाचन आयोगका सहायक प्रवक्ता दुर्गा प्रसाद चालिसेले हस्ताक्षर गरेको प्रेस विज्ञप्तिमा सबै नेपाली दाजुभाइ तथा दिदीबहिनीलाई मतदाता नामावलीमा नाम समावेश गराउन समयमै सम्बन्धित जिल्ला निर्वाचन कार्यालय वा तोकिएका नाम दर्ता केन्द्रमा पुग्न अनुरोध गरिएको छ ।

आयोगले नाम दर्ता प्रक्रिया नियमित रूपमा सञ्चालन भइरहेको जनाएको छ। नागरिकता प्रमाणपत्र लिएपछि १६ वर्ष उमेर पुगेका नेपाली नागरिकले मतदाता नामावलीमा नाम दर्ता गराउन सक्नेछन् ।