चन्दन यादब 
राजविराज । राजविराज नगरपालिकाको गाडीले ठक्कर दिई घाइते बनाएका बोदेबरसाइन नगरपालिका–१ का १६ वर्षीय राजेश कुमार यादवको उपचार खर्च माग गर्दै पीडित परिवार र आफन्तहरूले नगरपालिकामा तालाबन्दी गर्दै अनिश्चितकालीन धर्ना सुरु गरेका छन् ।
नगरपालिकासँग पटक–पटक माग गर्दा पनि आश्वासन बाहेक केही नपाएपछि पीडित पक्ष सोमबारदेखि राजविराज नगरपालिकाको मूल गेटमा तालाबन्दी गर्दै धर्नामा बसेका हुन् ।
पीडितका बुबा रघुनाथ यादवका अनुसार दुर्घटनाको महिनौँ बितिसक्दा पनि नगरपालिकाले उपचार खर्च नदिँदा छोरा अझै अस्पतालमै बन्धक छन्। “उपचार खर्च बुझाउन नसकेकाले छोरालाई घर ल्याउन सकिएको छैन,” उनले गुनासो गरे ।
दुर्घटना २०८२ साल माघ १ गते बोदेबरसाइन नगरपालिका–५ स्थित सडकखण्डमा भएको थियो। राजविराज नगरपालिकाको सवारी साधनले ठक्कर दिँदा राजेशसँगै अर्का २२ वर्षीय अजितकुमार यादव पनि घाइते भएका थिए ।
राजेशका काका बैधनाथ यादवका अनुसार अजितको उपचार राजविराजस्थित छिन्नमस्ता अस्पतालमा गरिएर उनी घर फर्किसकेका छन्। तर गम्भीर घाइते राजेशको उपचार विराटनगरको विराट नर्सिङ होममा भइरहेको छ ।
“भतिजालाई ९० दिनसम्म आइसियूमा राखेर उपचार गरियो, होस आउन मात्र ९२ दिन लाग्यो,” बैधनाथले भने ।
अस्पतालमा उपचार खर्च तिर्न नसक्दा राजेश अहिले पनि अस्पतालमै रहेका छन् । न्यायको खोजीमा पीडित पक्षले ‘संघर्ष समिति’ गठन गरी पटक–पटक नगरपालिकासँग क्षतिपूर्तिको माग गर्दै आन्दोलन गर्दै आएको छ ।
हामी क्षमा चाहन्छौं यो पोस्ट धेरै पुरानो भएको ले कमेन्ट बक्स बन्द गरेको छौं |