जसपा सप्तरी निर्वाचनमा षड्यन्त्र भयो : उमेश यादवको आरोप

राजविराज । जनता समाजवादी पार्टी (जसपा) नेपाल, सप्तरीका अध्यक्ष पदका पराजित उम्मेदवार उमेश प्रसाद यादवले आफूलाई योजनाबद्ध षड्यन्त्रपूर्वक हराइएको आरोप लगाएका छन् ।

साउन १८ गते सम्पन्न जसपा सप्तरीको अध्यक्ष निर्वाचनमा केदार यादव २३५ मतसहित विजयी हुँदा उमेश यादवले २०५ मत प्राप्त गरेका थिए । उमेश यादव ३० मतले पछि पर्नुका कारणबारे उनले सामाजिक सञ्जालमार्फत विस्तृत अभिव्यक्ति सार्वजनिक गर्दै चुनाव प्रक्रियामै गम्भीर अनियमितता भएको दाबी गरेका छन् ।

उनका अनुसार निर्वाचनमा दुई फरक नमूना मतपत्र प्रयोग गरी विपक्षीलाई अल्झाइएको र आफ्ना ६० मत उद्देश्यपूर्वक बदर गरिएको हो। “जति मतले जितेका छन्, त्यो भन्दा दोब्बर मत रद्द गराइयो,” यादवले भनेका छन्, “६० मत बदर गरेर आफ्नो जीत सुनिश्चित गर्नु कहाँको न्याय हो ?”

यादवले आरोप गरेका छन् कि कसैको नाम अगाडि खाली ठाउँ राखेर मतदातालाई भ्रमित पार्ने रणनीति अपनाइएको थियो, जसका कारण धेरै मत अमान्य बनाइयो। उनले यसलाई “मिशन पूरै षड्यन्त्र”को रूपमा चित्रण गरेका छन् ।

आचारसंहिता बैठकमा पटक–पटक आग्रह गर्दा पनि आफ्नो कुरा नसुनिएको गुनासो गर्दै यादवले पार्टी नेतृत्वमा रहेको आन्तरिक द्वन्द्व, कलह र अभिमानलाई जनभावनाभन्दा माथि राखिएको बताएका छन् । “वर्षौंपछि नेतृत्व परिवर्तन हुनुपर्ने जनमानसको भावना थियो, तर त्यसको कदर गरिएन,” उनले भने ।

उनको दाबीअनुसार निर्वाचन भए पनि पुरानै नेतृत्वलाई अग्रपंक्तिमा ल्याउने उद्देश्यका साथ “ठूला–ठूलाको आँखामा धूलो हालिएको” छ । स्वच्छ निर्वाचनको सट्टा पूर्वाग्राही निर्णय भएको आरोप लगाउँदै उनले पार्टीभित्र संयमता र सत्यता अपनाउन सबैलाई आग्रह गरेका छन् ।