पार्टी निर्माण र सामाजिक न्यायका लागि एकजुट भएर लागौ : उपेन्द्र यादव

राजविराज । जनता समाजवादी पार्टी (जसपा) नेपाल सप्तरीको नवनिर्वाचित जिल्ला कार्यसमितिको शपथग्रहण तथा पदभार ग्रहण कार्यक्रम बुधबार सम्पन्न भएको छ ।

राजविराजस्थित जिल्ला समन्वय समितिको सभाहलमा सम्पन्न कार्यक्रममा निर्वाचन समिति संयोजक कृष्ण प्रसाद यादवले अध्यक्ष केदार यादवसहित पदाधिकारी तथा कार्यसमिति सदस्यलाई शपथ ग्रहण गराए ।

कार्यक्रममा जसपा नेपालका केन्द्रीय अध्यक्ष उपेन्द्र यादवले पार्टी निर्माण, संगठन मजबुतीकरण र सामाजिक न्याय तथा अधिकारका लागि एकजुट भएर काम गर्न निर्देशन दिए । उनले मधेश र दलित–वंचित समुदायका हकहितका मुद्दामा पार्टीले निरन्तर आवाज उठाउने प्रतिवद्धता दोहोर्याए ।

सो अवसरमा प्रदेश सभा सदस्य अनिरुद्ध प्रसाद यादवले स्थानीय युवामाथि भएको प्रहरी दमनको कडा विरोध गर्दै निर्दोष लालु यादवको हत्या प्रकरणमा संलग्न दोषी प्रहरीलाई तत्काल निलम्बन गर्न माग गरे ।

राजविराज नगरपालिका–क वडा नं. का नगर प्रमुख इसरत परविनले पार्टीका लक्ष्य र उद्देश्य पूरा गर्न ईमान्दारिता र एकजुटताका साथ अघि बढ्नुपर्नेमा जोड दिइन् ।

नवनिर्वाचित जिल्ला अध्यक्ष केदार यादवले संगठन बलियो बनाउन सम्पूर्ण कार्यकर्ताले सक्रिय भूमिका निर्वाह गर्नुपर्ने बताए । कार्यक्रममा केन्द्रीय सदस्य विकास तिवारी, शैलेन्द्र मोहन झा, अमरनाथ मण्डल, गीता यादव, प्रदेश सभा सदस्य इसुफ अली, प्रदेश सदस्य किशोर कुमार यादव, सल्लाहकार समिति सदस्य श्यामदेव यादव, केन्द्रीय अनुशासन समिति सदस्य कैलाश यादवलगायतले शुभकामना मन्तव्य दिएका थिए ।

चार वर्षको कार्यकाल पाउने यस कार्यसमितिले संगठन विस्तार र सुदृढीकरणलाई प्राथमिकतामा राख्ने जनाएको छ । कार्यक्रममा अवकाश प्राप्त सब–इन्जिनियर योगेन्द्र प्रसाद यादव जसपा नेपालमा प्रवेश गरेका छन् ।