महुलीमा हटिया गिलेशनमा गुणस्तरहीन कामको आरोप, ल्याब टेस्टको रिपोर्ट सार्वजनिक गर्न माग

राजविराज । अग्नीसाइरकृष्णा संवरण गाउँपालिका–६ स्थित महुली हटिया बजारमा पालिकास्तरीय बजेटबाट निर्माणाधीन गिलेशन भवनमा गुणस्तरहीन काम भएको आरोप लगाउँदै स्थानीयवासीहरूले ल्याब टेस्टको रिपोर्ट तत्काल सार्वजनिक गर्न माग गरेका छन् ।

बिहीवार महुलीमा पत्रकार सम्मेलन गर्दै स्थानीयहरूले निर्माणमा कमसल सामग्री प्रयोग गरिएको भन्दै विरोध जनाए । उनीहरूले गुणस्तरीय काम भएको वा नभएको प्रमाणका लागि गराइएको ल्याब टेस्टको रिपोर्ट अहिलेसम्म सार्वजनिक नगरिएको भन्दै आक्रोश व्यक्त गरे ।

हटिया बजार व्यवस्थापन समितिका पूर्व अध्यक्ष रोशन कुमार मण्डलले असार २३ गते गरिएको छत ढलानमा कमसल सामग्री प्रयोग भएको दाबी गरे । उनका अनुसार, उपभोक्ता तथा पेटीदारको विरोध हुँदाहुँदै पनि रातारात जबर्जस्ती ढलान गरिएको थियो ।

स्थानीय श्यामकान्त चौधरीले ४३ ग्रेडको सिमेन्ट प्रयोग भएको भए पनि गिटी, बालुवा र सिमेन्टको गुणस्तर कमजोर रहेको दाबी गर्दै विरोध गरेपछि तत्काल काम रोकिएको बताए । पेटीदारहरूले कोरकटिङ गरी ल्याब टेस्ट गरिसकिएको र त्यसको रिपोर्ट सार्वजनिक गर्नुपर्ने माग दोहोर्याएका छन् ।

अर्का स्थानीय उज्जवल अधिकारीले ल्याब रिपोर्टमा यदि गुणस्तरहीन सामग्री प्रयोग भएको पुष्टि भएमा पुरै ढलान भत्काएर पुनः काम गर्नुपर्ने माग गरे। उनका अनुसार रिपोर्ट आउन ढिलाइ हुनु नै शंका उत्पन्न गर्ने विषय हो ।

स्थानीय रामनाथ चौधरीले ल्याब टेस्टका लागि नमुना पठाइएको भए पनि अहिलेसम्म रिपोर्ट नआएको जानकारी दिए ।

उपभोक्ता समितिमार्फत पालिकाबाट ३० लाख रुपैयाँ लागतमा निर्माण भइरहेको उक्त भवनको छत ढलान कार्य श्रावण १९ गते नै कोरकटिङ गरिसकिएको छ । स्थानीयहरूका अनुसार ठेकेदारले मापदण्ड विपरीत काम गर्दै लागत घटाउनका लागि कमसल सामग्री प्रयोग गरेका छन् ।

उक्त कार्य असार १५ गतेभित्र सम्पन्न गर्ने सम्झौता भए पनि काम समयमा सम्पन्न नभएको जनाइएको छ ।

यस विषयमा वडा नं. ६ का अध्यक्ष अशोक आचार्यले हटिया गिलेशन भवनका लागि गाउँपालिकाबाट रकम निकासा नभएको बताएका छन् ।