प्रतिबद्धता कार्यान्वयन नभएपछि राजविराजमा लालपुर्जा संघर्ष समितिको पुनः आन्दोलन

राजविराज । बिटौरी र गाउँब्लक जग्गाको लालपुर्जा पाउनुपर्ने माग गर्दै राजविराज नगरपालिकाका स्थानीयवासीले फेरि आन्दोलन सुरु गरेका छन् । बिहीबार गजेन्द्र चोकमा पत्रकार सम्मेलन गर्दै उनीहरूले विगतमा गरिएको प्रतिबद्धता कार्यान्वयन नभएकाले पुनः संघर्षका कार्यक्रम घोषणा गरेको बताए ।

संघर्ष समितिका संयोजक इरसाद अन्सारीले आज भदौ ९ गतेदेखि आन्दोलनको नयाँ चरण सुरु भएको जानकारी दिए । उनका अनुसार ११ गते नगरपालिका कार्यालयमा दुई घण्टा धर्ना, १४ गते मसाल जुलुस, १५ गते बजार बन्दसहित नगरपालिकामा तालाबन्दी र १६ गते नगरवासीको बृहत् भेला गरेर पाँचौँ चरणको आन्दोलन कार्यक्रम घोषणा गरिनेछ ।

यसअघि फागुन १७ गते बजार बन्द गरेर आन्दोलनमा उत्रिएका स्थानीयले, जनप्रतिनिधि तथा राजनीतिक दलका प्रतिनिधिसँगको छलफलपछि माग सम्बोधन गर्ने आश्वासन पाएर आन्दोलन स्थगित गरेका थिए । तर अहिले सम्म कुनै पहल नभएको अन्सारीको भनाइ छ ।

स्थानीयले लालपुर्जासँगै राजविराज बसपार्क तत्काल सञ्चालन गर्नुपर्ने, हटियाको व्यवसायिक कम्पलेक्स निर्माण सुरु गर्नुपर्ने, खाँडो नदी तटबन्ध क्षेत्रका जग्गाको नापी गर्नुपर्ने, सिमानामा खाद्यान्नको विषादी परीक्षणका लागि क्वारेन्टाइन स्थापना गर्नुपर्ने, लामखुट्टे नियन्त्रणका लागि औषधि छर्किनुपर्ने र लामो समयदेखि बन्द रहेका छोटी भन्सारहरू सञ्चालनमा ल्याउनुपर्ने माग गरेका छन् ।

संघर्ष समितिका अनुसार नगरक्षेत्रभित्र मुख्य सडक तथा भित्री सडक किनारमा बसोबास गर्दै आएका करिब ५ हजार २ सय परिवारले लालपुर्जा नपाउँदा बैंक तथा वित्तीय संस्थाबाट ऋण लिन नपाई ठूलो समस्यामा परिरहेका छन् ।

सो पत्रकार सम्मेलनमा मधेश प्रदेशसभा सदस्य अनिरुद्ध प्रसाद सिंह यादव, पूर्व नगरप्रमुख अनिस अन्सारी र जगरनाथ दास, युवा नेता दिपेन्द्र चौधरीसहित संघर्ष समितिका पदाधिकारी तथा नगरवासीको उपस्थिति थियो ।