चन्दन यादब 
राजबिराज । हिन्दु नेपाली महिलाको महान् पर्व हरितालिका तीजको अवसरमा बिहीवार सप्तरीको रूपनी गाउँपालिकामा महिलाद्वारा दर खाने कार्यक्रम धुमधामका साथ मनाइएको छ ।
गाउँपालिका–१ स्थित हटिया प्राङ्गणमा आयोजित कार्यक्रममा रूपनी गाउँपालिकाका सबै ६ वटै वडाका महिलाहरूको सक्रिय सहभागिता रहेको थियो । कार्यक्रम रूपनी महिला विकास समितिकी अध्यक्ष जलेश्वरी देवी यादवको अध्यक्षतामा सम्पन्न भएको हो ।
सो अवसरमा गाउँपालिका उपाध्यक्ष पुष्पा श्रेष्ठ लौगीले तीज पर्वका धार्मिक, सामाजिक र सांस्कृतिक महत्वबारे प्रकाश पार्दै हरितालिका तीजको ब्रतअगाडि दर खाने परम्परा लामो समयदेखि चलिआएको बताइन् । उनले खिर, हलुवा, दही, दूध, मिठाइ, फलफूललगायत मीठा–मीठा परिकार तयार गरी दर खाने परम्पराले पर्वलाई अझै उत्साहमय बनाउने उल्लेख गरिन् ।
उपाध्यक्ष लौगीका अनुसार धार्मिक मान्यताअनुसार सत्ययुगमा पार्वतीले भगवान् शिवलाई पतिको रूपमा पाउन निराहार ब्रत बसेकी थिइन् र उनकी कामना पूरा भएको विश्वासका आधारमा आज पनि युवतीले योग्य पति पाउन तथा विवाहित महिलाले पतिको दीर्घायु र प्रगतिका लागि तीजको ब्रत बस्ने परम्परा रहेको छ ।
यसैबीच, पूर्व उपाध्यक्ष बेचनी सरदारले तीजलाई महिलाले गीतमार्फत आफ्ना पीडा, नमिठा पल र अन्यायपूर्ण व्यवहारलाई अभिव्यक्त गर्ने र त्यसलाई भुलेर खुशी हुने पर्वका रूपमा व्याख्या गरिन् । उनले विगतका दिनमा महिलाले माइती भेट्न पाउने अवसर तीजमै सीमित हुने गरेको अनुभव पनि सुनाइन् ।
कार्यक्रममा वडा अध्यक्ष लिला यादव, वरिष्ठ स्वास्थ्यकर्मी तारणी प्रसाद यादव, कोषाध्यक्ष यशोदा कार्की, वडा सदस्य अनार देवी पासवान, महिला नेतृ कविता ठाकुर, सामाजिक परिचालक सरिता यादव, समिति सदस्य राधा कार्की लगायतले शुभकामना मन्तव्य दिएका थिए ।
यस वर्ष दर खाने दिन भदौ ९ गते र हरितालिका तीज भदौ १० गते परेको छ ।
हामी क्षमा चाहन्छौं यो पोस्ट धेरै पुरानो भएको ले कमेन्ट बक्स बन्द गरेको छौं |