यहाँको अनुभवले भविष्यका लागि क्षमता बढाएको छ : सीडीओ दाहाल

राजविराज । सप्तरीका प्रमुख जिल्ला अधिकारी (सीडीओ) भोला दाहालले जिल्लामा आफ्नो कार्यकालका दौरान सबै पक्षबाट सहयोग र माया पाएको बताएका छन् ।

दोलखा सरुवा भई बिदाइ हुँदै गर्दा शुक्रबार सञ्चारकर्मीहरूसँग कुरा गर्दै दाहालले राजनीतिक दल, पालिका प्रमुख, सञ्चारकर्मी तथा सबै निकायले समन्वयकारी भूमिका निर्वाह गरेको कारण आफूलाई सहज रूपमा काम गर्न सकेको बताए ।

‘गोरखाबाट सरुवा भएर सप्तरी आउँदा कतिपयले यस्तो खत्तम जिल्ला नजानु भन्ने सुझाव दिएका थिए,’ दाहालले स्मरण गर्दै भने, ‘तर ती भनाइहरू गलत साबित भए । यहाँ मैले अत्यधिक माया र प्रेम पाएको छु ।’

सप्तरीलाई अनावश्यक रूपमा बदनाम गर्ने गरिए पनि आफूले यस जिल्लामा घर–परिवारजस्तै अनुभूति गरेको दाहालको भनाइ छ । उनले सप्तरीलाई तालिमस्थलका रूपमा व्याख्या गर्दै यहाँको अनुभवले अब जुनसुकै जिल्लामा गएर सहज रूपमा काम गर्न सक्ने आत्मविश्वास मिलेको बताए ।

‘यहाँ काम गर्दा मैले कुनै पनि नाजायज फाइदा लिएको छैन,’ उनले भने, ‘मेरो नाम प्रयोग गरेर कसैले फाइदा लिएको भए त्यो उसको जिम्मेवारी हो ।’

झण्डै साढे नौ महिना सप्तरीमा कार्यरत रहेपछि दाहाललाई दोलखा जिल्ला प्रशासन कार्यालयमा सरुवा गरिएको हो ।