प्रेस जनमत संघद्वारा महासंघ अध्यक्षलाई ज्ञापनपत्र

काठमाडौं । नेपाल पत्रकार महासंघमा सदस्यता नवीकरण र नयाँ सदस्यता वितरणमा विभेद भएको आरोप लगाउँदै प्रेस जनमत संघले नेपाल पत्रकार महासंघकी केन्द्रीय अध्यक्ष निर्मला शर्मालाई ज्ञापनपत्र बुझाएको छ ।

संघका अध्यक्ष अवधेश कुमार झाको नेतृत्वमा बुझाइएको ज्ञापनपत्रमा महासंघले आफ्नो साझा र सर्वसमावेशी चरित्रलाई कायम राख्नुपर्नेमा जोड दिइएको छ ।

ज्ञापनपत्रमा आस्था वा विचारधाराका आधारमा सदस्यता नवीकरण र नयाँ सदस्यता वितरणमा असमानता देखिएको भन्दै आपत्ति जनाइएको छ । “नेतृत्वसँग आस्था राख्नेहरूको सदस्यता सहजै नवीकरण हुने तर फरक आस्था राख्ने पत्रकारहरूको सदस्यता अस्वीकृत हुने प्रवृत्ति साझा भावनाविपरीत छ,” ज्ञापनपत्रमा उल्लेख छ ।

महासंघले शुद्धिकरणका नाममा व्यक्तिगत रिसइबी साध्ने कार्य गरेको आरोप पनि लगाइएको छ । “काठमाण्डौमा एक किसिमको मापदण्ड र तराई–मधेशका जिल्लामा अर्को मापदण्ड प्रयोग गरेर सदस्यता खारेज गर्नु अन्यायपूर्ण छ,” संघले जनाएको छ ।

प्रेस जनमत संघले गत निर्वाचनमा शुद्धिकरणका नाममा भएको अन्याय तत्काल सच्याउन आग्रह गर्दै फरक आस्थाका पत्रकारलाई पनि समान अवसर र अधिकार सुनिश्चित गर्न महासंघ नेतृत्वसँग माग गरेको छ ।

संघले महासंघलाई सबै पत्रकारको साझा संगठनका रूपमा कायम राख्नुपर्ने आवश्यकता औंल्याउँदै, “सदस्यतामा भइरहेको विभेद अन्त्य होस् र महासंघबाट प्रदान हुने अवसरमा सबै पत्रकारहरूले अपनत्वको अनुभव गर्न पाऊन्,” भन्ने अपेक्षा व्यक्त गरेको छ ।