विराट मेडिकल कलेजका स्वास्थ्यकर्मी आन्दोलनमा, उपचार सेवा प्रभावित

विराटनगर । विराट मेडिकल कलेज टिचिङ अस्पतालका स्वास्थ्यकर्मीहरू शनिबारदेखि आन्दोलनमा उत्रिएका छन् । नर्ससहितका सम्पूर्ण स्वास्थ्यकर्मीहरूले हातमा कालो पट्टी बाँधेर अस्पताल परिसरमा नाराबाजी गर्दै आन्दोलनलाई निरन्तरता दिएका छन् ।

आन्दोलनरत स्वास्थ्यकर्मीहरूले प्रचलित कानुनअनुसारको तलब तथा सेवा सुविधा उपलब्ध गराउन माग गरेका छन् । उनीहरूले ‘महँगाे अस्पताल–सस्तो नर्स’, ‘सेवा शिर झुक्दैन–अन्यायमा घुँडा टेक्दैनौं’, ‘विदेश जान बाध्य नगर–हामीलाई नेपाल प्यारो छ’, ‘इनफ इज इनफ’ भन्ने प्लेकार्ड बोकेर विरोध प्रदर्शन गरेका छन् ।

कतिपय नर्स तथा स्वास्थ्यकर्मीहरूले अस्पताल प्रशासनले उनीहरूलाई १२ हजार रुपैयाँसम्मको न्यूनतम तलबमा काम गराउँदै आएको र वर्षौंसम्म आश्वासन दिएर ठगिरहेको आरोप लगाएका छन् । उनीहरूले माग प्रस्तुत गरेपछि उल्टै प्रशासनले लाइसेन्स खारेज गर्ने धम्की दिएको पनि आरोप लगाएका छन् ।

स्वास्थ्यकर्मीहरूले माग पूरा नभएसम्म आन्दोलन जारी राख्ने चेतावनी दिएका छन् । आन्दोलनका कारण अस्पतालको दैनिक उपचार सेवा प्रभावित भएको छ ।

उता, अस्पताल प्रशासनले भने आन्दोलनरत स्वास्थ्यकर्मीहरूसँग आवश्यक समन्वय भइरहेको जनाउँदै माग पूरा हुने वा नहुनेबारे कुनै टिप्पणी गर्न चाहेन ।

स्वास्थ्यकर्मीहरूको आन्दोलन निरन्तर भइरहेकाले अस्पतालमा उपचारका लागि आएका बिरामीहरू समस्यामा परेका छन् ।