बिष्णुपुर गाउँपालिका जिल्लाकै चौथो बालविवाह मुक्त पालिका घोषणा

राजविराज । सप्तरीको बिष्णुपुर गाउँपालिकालाई मधेश प्रदेश तथा जिल्लाकै चौथो बालविवाह मुक्त गाउँपालिका घोषणा गरिएको छ ।

आइतबार गाउँपालिकाको प्राङ्गणमा आयोजित कार्यक्रममा पूर्व मन्त्री तथा संविधानसभा सदस्य उमेश यादवले ब्यानर वाचन गर्दै र गाउँपालिका अध्यक्ष उमेश यादवले घोषणा पत्र वाचन गरी बालविवाह मुक्त गाउँपालिका घोषणा गरेका हुन् ।

गाउँपालिकाका अध्यक्ष उमेश यादवका अनुसार पालिकाभित्रका सबै वडामा २० वर्ष उमेर पूरा नगरी विवाह भएको नपाइएको र बालविवाह मुक्त वडा घोषणाका लागि आवश्यक ९० प्रतिशत सूचक पूरा भएपछि बिष्णुपुर गाउँपालिकालाई बालविवाह मुक्त घोषणा गरिएको हो ।

उक्त अवसरमा पूर्व मन्त्री उमेश यादवले बालविवाहले जीवन नष्ट गर्नुका साथै स्वास्थ्य, शिक्षा र रोजगारीमा समेत नकारात्मक प्रभाव पार्ने बताए । उनले २० वर्ष उमेर पूरा नगरी विवाह नगर्न र नगराउन सबैलाई आग्रह गर्दै हरेक समुदायले बालविवाह निरुत्साहित गरी बालविवाह मुक्त समाज निर्माणमा जिम्मेवार बन्नुपर्नेमा जोड दिए ।

गाउँपालिका अध्यक्ष उमेश यादवको अध्यक्षतामा सम्पन्न घोषणा सभामा वडा नं. ७ का वडा अध्यक्ष लोचन साह, वडा नं. १ का वडा अध्यक्ष भोगेन्द्र यादव, वडा नं. ५ का वडा अध्यक्ष जिवछ मण्डल, गाउँपालिका प्रशासन प्रमुख गंगाराम साह, सेभ द चिल्ड्रेनका सिनियर म्यानेजर उमेश गुप्ता, सिनियर प्रोजेक्ट संयोजक मकर बहादुर सार्की, सेभ द सप्तरीका अध्यक्ष ध्रुव देव, फरजना खातुन लगायतले बालविवाह कानुनी अपराध भएको उल्लेख गर्दै बालविवाह मुक्त पालिका घोषणालाई प्रभावकारी रूपमा कार्यान्वयन गर्न सबै सरोकारवाला निकायले सक्रिय भूमिका खेल्नुपर्नेमा जोड दिए ।