अन्तिम खेलमा पिके टिम विजयी
चन्दन यादब 
राजविराज । सप्तरी क्रिकेट संघको आयोजनामा राजविराजमा सम्पन्न ईन्डो–नेपाल मैत्रीपूर्ण तीनदिवसीय क्रिकेट श्रृंखलामा सप्तरीले २–१ ले श्रृंखला कब्जा गरेको छ ।
श्रृंखलाअन्तर्गत आज सम्पन्न तेस्रो तथा अन्तिम खेलमा युपीको पिके टिमले सप्तरीलाई १९ रनले पराजित गर्दै जित निकालेको हो । युपीले तीन खेलमध्ये एक खेल जित्दा सप्तरीले दुई खेल जितेर श्रृंखला आफ्नो पक्षमा पारेको हो ।
बुधबार पिके टिमले टस जितेर ब्याटिङ गर्दै ३९ ओभर ५ बलमा सबै विकेट गुमाएर २५४ रनको योगफल तयार गर्यो । पिकेका गौरब वर्माले उत्कृष्ट ब्याटिङ गर्दै १०४ रन बनाए । हम्जाले ४७ रन र ध्रुवले २८ रन जोडे ।
बलिङतर्फ सप्तरीका अविमन्यु सरदारले ४ विकेट लिए भने सुशान्त देवले २ विकेट लिएका थिए । भिम यादव र नितिष शर्माले समान १–१ विकेट हात पारे ।
२५५ रनको लक्ष्य पछ्याएको सप्तरी ३८ ओभर २ बलमा २३५ रनमै समेटियो । भिम यादवले ७९ रनको उत्कृष्ट पारी खेले पनि टोलीलाई जित दिलाउन सकेनन् । शिव अधिकारीले ४१, विजय यादवले ३०, गोपाल मण्डलले २३ र रोहन विकले १९ रन बनाए ।
पिके टिमतर्फ ध्रुवले ४ विकेट लिए भने हम्जाले ३ विकेट लिए । गौरब वर्मा र केतनले समान १–१ विकेट लिए ।
खेलको ‘प्लेयर अफ द म्याच’ पिके युकेका गौरब वर्मा घोषित भए । प्रतियोगिताको बेस्ट बलर ध्रुव कुमार, बेस्ट ब्याटर गौरब वर्मा तथा प्लेयर अफ द सिरिज सप्तरीका भिम यादव घोषित भए ।
विजेता, उपविजेता तथा उत्कृष्ट खेलाडीहरूलाई नेपाल पत्रकार महासंघका केन्द्रीय सदस्य राजु विक, सप्तरी क्रिकेट संघका उपाध्यक्ष निरज सिंह, सचिव चन्दनकुमार यादव, सदस्य संजय कार्की, शम्भु दास, सबल नेपालका परियोजना संयोजक नवनित जायसवाल, आरआरआर फेसन हबका सञ्चालक राहुल सिंह, अम्पायर सन्तोष देव, नेपाल पुलिस टिमका प्रशिक्षक चित्रबहादुर विष्ट, अम्पायर विवेक चौरसिया र अमित यादवलगायतले कप, मेडल, शिल्ड तथा प्रमाणपत्र प्रदान गरेका थिए । कार्यक्रमको सञ्चालन उज्जवल यादवले गरेका थिए ।
हामी क्षमा चाहन्छौं यो पोस्ट धेरै पुरानो भएको ले कमेन्ट बक्स बन्द गरेको छौं |