मनोनयन दर्तामा आउने पहिलो उम्मेदवारको मनोनयन गरिने : मुख्य निर्वाचन अधिकृत घिमिरे

राजविराज । जिल्लाका मुख्य निर्वाचन अधिकृत तथा प्रतिनिधि सभा निर्वाचन क्षेत्र नम्बर–२ का निर्वाचन अधिकृत किशोर घिमिरेले माघ ६ गते हुने मनोनयन दर्ताका क्रममा आउने पहिलो दलका उम्मेदवारको मनोनयन दर्ता गरिने जानकारी दिनुभएको छ ।

आइतबार राजविराजस्थित मुख्य निर्वाचन अधिकृतको कार्यालयमा आयोजित बृहत् बैठकमा उहाँले उक्त कुरा बताउनुभएको हो।
मुख्य निर्वाचन अधिकृत घिमिरेले निर्वाचन आचारसंहिताअनुसार मनोनयन दर्ताका लागि आउने दलले २५ जनाभन्दा बढी व्यक्ति नल्याउन आग्रह गर्नुभएको छ। साथै सुरक्षा अवस्थालाई मध्यनजर गर्दै मनोनयन दर्ताका क्रममा भिडभाड नगर्न र शान्त वातावरण निर्माणमा सहयोग गर्न राजनीतिक दलहरूसँग आग्रह गर्नुभएको छ ।

प्रतिनिधि सभा सदस्य निर्वाचनको निर्वाचन तालिकाअनुसार माघ ६ गते मनोनयन दर्ता गर्ने कार्यक्रम तय गरिएको छ । उक्त बैठकमा सप्तरीका प्रमुख जिल्ला अधिकारी टुवराज पोखरेलले मनोनयन दर्ताका बेला एकैचोटि भिडभाड हुने सम्भावना रहेकाले राजनीतिक दलहरूलाई पालैपालो मनोनयन दर्ता गर्न आग्रह गर्नुभएको थियो ।

सो अवसरमा राजविराज नगरपालिका कार्यवाहक नगर प्रमुख ईसरत प्रविणसहित जिल्लास्थित सुरक्षा निकायका प्रमुखहरूको उपस्थिति रहेको थियो ।