चन्दन यादब 
राजबिराज, १५ भाद्र । सप्तरीका नवआगन्तुक प्रमुख जिल्ला अधिकारी किरण थापाले जिल्लाको शान्ति, सुरक्षा र सुशासनलाई चुस्त राख्न प्रतिबद्ध रहेको बताउनु भयो ।
जिल्ला प्रशासन कार्यालय सप्तरीमा शुक्रबार आयोजित पत्रकार भेटघाट कार्यक्रममा बोल्दै उनले पत्रकार र प्रशासन एकअर्काको परिपुरक भएको भन्दै सुमधुर सम्बन्ध हुनुपर्ने आवश्यकता रहेको बताएका हुन ।
पत्रकार भेटघाट कार्यक्रम बोल्दै नवआगन्तुक प्रजिअ थापाले जिल्लामा शान्ति सुरक्षा तथा सुशासन कायम राख्नको लागि पत्रकारहरूसँग सहकार्य गरेर अगाडि बढ्ने प्रतिबद्धता व्यक्त गरे ।
हामी विच जिल्लामा हुने सबैखाले बेथिति अन्त्य गर्न सहकार्य जरुरी छ, उनले भने, प्रशासनबाट हुने कमिकमजोरीलाई पत्रकारहरूले निरन्तर खबरदारी गरेमात्र खराब बाटोमा हिड्नेहरू ठूलो दुर्घटनाबाट जोगिन्छन्, त्यसका लागि प्रशासन र पत्रकार बिचको सहकार्यलाई प्रगाढ बनाउनमा कमी हुन दिन्न, हाम्रो सम्बन्ध सुमधुर रहन्छ ।
पत्रकारको सुरक्षामा कमी आउन नदिने बताउँदै प्रजिअ थापाले प्रशासन र पत्रकार दुबै पक्षको एक(आपसमा सम्मान व्यवहारले सम्बन्ध विस्तारमा सहयोग पुग्ने विश्वास व्यक्त गरे । उनले समाजलाई हानी र कुनै व्यक्तिलाई फाइदा हुने किसिमले समाचारलाई स्थान नदिन आग्रह गरे ।
सप्तरीमा खुल्ला सिमानाका कारण हुने चोरी निकासी, मिटर व्याज पीडितका नाममा हुने चलखेल, अस्पतालमा रहेको बेथिति, सडक दुर्घटना, स्थानीय तहहरूमा भइरहेको भ्रष्टाचारको घटना, विधुत समस्या, खुलेयाम अखाद्य बस्तुको बिक्री वितरण, फोहर व्यवस्थापन, सरकारी कार्यालयमा हुने ढिलासुस्ती, कर्मचारी अभाव र विचौलियाको प्रभाव, लागु औषधको बिक्री तथा युवापुस्तामा पारेको प्रभाव, छाडा चौपायाले निम्त्याएको समस्या, सार्वजनिक स्थानहरूमा भइरहेको चोरीका घटना, हत्या तथा आपराधिक घटनामा भईरहेको वृद्धिले शान्ति सुरक्षामा चुनौती थपेकोले यसलाई नियन्त्रण गर्न अग्रसर हुन पत्रकारहरूले सुझाव दिएका थिए ।
पछिल्लो समय प्रहरी प्रशासनबाट पत्रकार माथि कुटपिट , समाचार सङ्कलनमा अवरोध, संविधान तथा मानव अधिकार उल्लङ्घनका घटनाले सप्तरीका पत्रकारहरू असुरक्षित रहेको भन्दै पत्रकारहरूले प्रजिअ थापाको ध्यानाकर्षण गराएका थिए । पत्रकारहरूले दिएको सुझावलाई गम्भीरतापूर्वक लिएको बताउँदै प्रजिअ थापाले क्रमशः कार्यान्वयनमा लैजाने प्रतिबद्धता व्यक्त गरे ।
भेटघाट कार्यक्रममा नेपाल पत्रकार महासंघका अध्यक्ष श्रवण कुमार देव, पुर्व केन्द्रिय सदस्य अबधेश झा, प्रेस स्वतन्त्रता सेनानी एवम् शाखा सप्तरीका पूर्व सभापति बैधनाथ झा, धिरेन्द्र प्रसाद साह, वरिष्ठ पत्रकार अनिल अनल, गणेशलाल देव, नेपाल पत्रकार महासंघ प्रदेश परिषद सदस्य बृजमान तामाङ, प्रेस संगठनका केन्द्रिय सदस्य नर्मदेव यादव, प्रेस मञ्चका केन्द्रिय सदस्य चन्दन यादव, प्रेस युनियन सप्तरीका अध्यक्ष विनयलाल कर्ण, पत्रकार देवराम यादव, कृष्णा कुमार मण्डल लगायतकाले जिल्लाको अवस्था, तथा वस्तुस्थिति बारे जानकारी गराएका थिए ।
हामी क्षमा चाहन्छौं यो पोस्ट धेरै पुरानो भएको ले कमेन्ट बक्स बन्द गरेको छौं |