राजविराज, १७ भाद्र । “हमर खडक हमर पहिचान” भन्ने नाराका साथ सुखी र स्वस्थ शहर लागि खडक नगरपालिकामा सप्ताहव्यापी सरसफाइ अभियान सुरु भएको छ ।
गत शनिवार देखी एस एन भि नेपालको सहयोग एवं सबल नेपालको सहकार्यमा मित्र समाज काठमाडौँद्वारा सुखी र स्वस्थ शहर अभियान अन्तर्गत सप्ताहव्यापी सरसफाइ अभियान खडक नगरपालिकामा सञ्चालनमा ल्याईएकाे हो । गरपालिकाको उत्तरी क्षेत्र भन्दा दक्षिणी क्षेत्रमा सरसफाइमा निक्कै समस्या देखिएकोले यस अभियानलाई मुख्यरूपमा वडा नं १, २,९, १० र ११ मा केन्द्रित गरेर अभियान सुरु गरेको सबल नेपालका कार्यक्रम संयोजक परमेश्वर झाले जानकारी दिए ।
सरसफाइका मुख्य व्यवहारहरू स्वच्छ कर चर्पीको प्रयोग, साबुन पानी ले हात धुने, महिनावारी स्वच्छता व्यवस्थापन, ठोस फोहर व्यवस्थापन एवं दिसा जन्य लेदो व्यवस्थापनको वर्तमान अवस्था बारे जानकारी हासिल गर्नका लागि स्वयंसेवक हरुलाई परिचालन गरिएको झा ले बताए। यस अभियानका लागि ८ जना स्वयंसेवक परिचालन गरी लक्षित वडाहरूमा गएर त्यहाँका वस्तु स्थिति अवलोकन गर्ने, सर्वेक्षण गर्ने, घरधुरी भ्रमण, विभिन्न सरोकारवालाहरूसँग भेटघाट गर्ने, अन्तरक्रियात्मक कार्यक्रम गर्ने तथा आम भेला गर्ने जस्तो क्रियाकलापहरू आदि सञ्चालन गरिने बताईएको छ । यसैगरी गत बिहीवार वडा नं १० र ११ एवं १ र २ का वडा अध्यक्ष लगायतका सरोकारवालाहरू सँग वृहत बैठक सञ्चालन गरिएको थियो ।
खडक नगरपालिकाका स्वास्थ्य शाखा प्रमुख दिनेश झा तथा एस एन भि नेपालका कृष्ण जिशिका विशेष उपस्थितमा आयोजना गरिएको उक्त बैठकमा वडाहरूमा देखिएको सरसफाइका समस्याहरू, चुनौतीहरू बारे छलफल गरी आगामी दिनका लागि कार्ययोजना समेत बनाउने उद्देश्य रहेको सबल नेपालका निर्देशक दिपक झा बताउँछन् । जस अनुसार सुरुवातमा माइकिङ्ग गर्ने र चर्पी न भएका घरधनीलाई आ आफ्नो घरमा चर्पी बनाउनका लागि एवं जथाभावी फोहोर नफाली आ आफ्नो घरमा कुहिने र न कुहिने फोहोर व्यवस्थापनका लागि अनुरोध गर्ने एवं बाहिर दिसा पिसाब गर्ने लाई चर्पीको अनिवार्य प्रयोगका लागि आग्रह गर्ने अभियान सञ्चालन गरिनेछ।
कार्यक्रममा दोश्रो चरणमा कडाइका साथ अगाडि बढ्ने सम्पूर्ण सरोकारवालाले प्रतिवद्धता जनाएको छ । सप्ताहव्यापी रुपमा सञ्चालन भएको यस अभियानको पहिलो दिन खडक नगरपालिकाका नगर प्रमुख जय प्रकाश चौधरीद्वारा स्वयंसेवक हरुलाई टिका लगाएर शुभकामना दिएको थियो । भाेली शनिवार यस अभियानको समापन गरिने छ भने नगरपालिका भित्र रहेका सम्पूर्ण सरोकारवालाहरुको भेला गराई सरसफाइमा देखिएका समस्याहरुको वारेमा कार्य योजना बनाई सञ्चालनमा ल्याईने बताईएको छ ।
हामी क्षमा चाहन्छौं यो पोस्ट धेरै पुरानो भएको ले कमेन्ट बक्स बन्द गरेको छौं |