मारियो मृग, समातियो शिकारी शंका घेरामा प्रहरी अनुसन्धान

सप्तरी । संरक्षित जनावर दुई वटा मृग (हरिण) को सप्तरीमा बिहीवार राती शिकारीले मारेको घटना सार्वजनिक भएको छ । श्रोतका अनुसार सप्तरीको हनुमाननगर कंकालिनी नगरपालिका वडा नम्बर १३ गोबरगाढा पलारमा शिकारीको एक समुहले दुईवटा मृग मारेको हो ।

मृग मारेको भनि सूचनाको आधारमा खटिएका प्रहरी टोलीले आज शुक्रवार बिहान ४ बजेको समयमा हनुमाननगर कंकालिनी नगरपालिका वडा नम्बर ८ योगिनियाँ स्थित कोसी पलारबाट राजविराज नगरपालिका ५ निवासी ४६ वर्षिय डा. शैलेस कुमार झालाई उक्त मृत मृगको मासु र हतियारसहित पक्राउ गरेपछि मृग मारिएको घटना सार्वजनिक भएको हो ।

मारिएको दुई वटा मृगमध्ये एउटा गोबरगाढा पलारमै राखिएको र अर्को मृगको मासु लिएर डा. झा ट्रयाक्टरमा आउँदै गरेको अवस्थाबाट पाँज जनासहित पक्राउ परेका थिए । तर प्रहरीलाई सूचना दिने स्थानीय एक जना नेताको भनसुनका आधारमा ती चार जना र ट्रयाक्टरलाई छाडिदिएको तथ्यले प्रहरी अनुसन्धान पनि शंका घेरामा पुगेको छ ।

यता जिल्ला प्रहरी कार्यालय सप्तरीका प्रहरी उपरीक्षक गजुसिद्धी बज्राचार्यका अनुसार पक्राउ परेका झाको साथबाट दुईवटा बोरामा मृगको ३५ केजी मासु, दुईवटा म्याग्जिनमा ६ राउण्ड गोली लाउड भएको दुई नाले राईफल बन्दुक, थप ३५ राउण्ड गोली बरामद भएको छ । यसका अलावा रातीको समयमा अँध्यारो छल्न प्रयोग गरिने थर्मनल क्यामेरासमेत बरामद भएको छ ।

मृगको मासु र हतियासहित पक्राउ परेका झालाई जिल्ला प्रहरी कार्यालय सप्तरीले अनुसन्धान पूरा गरि आवश्यक कारबाहीको लागि वन डिभिजन सप्तरीको जिम्मा लगाएको जानकारी प्रहरी उपरीक्षक बज्राचार्यले जानकारी दिए । पक्राउ परेका झासँग बन्दुक र गोलीको इजाजत पत्र भएपनि संरक्षित जनावर मृग मार्ने काम गैरकानूनी भएकोले आवश्यक अनुसन्धान पूरा गरेर कारबाहीकोलागि वन डिभिजनको जिम्मा लगाईएको होू, प्रहरी उपरीक्षक बज्राचार्यले भने ।

पछिल्लो केही समयदेखि गोबरगाढा पलारमा जंगली बँदेल र मृगको लगातार चोरी शिकारी भईरहेको छ । उक्त शिकारीको समूहमा स्थानीय केही शिकारीसँगै नेपाल प्रहरीका एक जना अवकाशप्राप्त डीआईजीकोसमेत संलग्नता रहेको छ ।

स्थानीय श्रोतका अनुसार शिकार गरिने बँदेल र मृगको मासु हनुमाननगर कंकालिनी नगरपालिकास्थित नेपाल प्रहरी र सशस्त्र प्रहरीसमक्ष पुग्ने गरेका छन् भने जिल्लास्थित केही राजनीतिक दलका नेता र गणमान्य ब्यक्तिसमक्षसमेत पुग्ने गरेको छ । यतिमात्रै नभई जनकपुर र काठमाण्डौसम्मसमेत बँदेल र मृगको मासु पुर्याउने काम भईरहेको छ ।

यता संगठितरुपमा हुँदै आएको जनावरको तस्करी नियन्त्रण गर्न आफुहरु सक्रिय रहेको सप्तरीका प्रहरी उपरीक्षक बज्राचार्यको दाबी छ । वन डिभिजन कार्यालय सप्तरीका प्रमुख हेमन्त साहले जनावरको शिकारी नियन्त्रण र संलग्नहरुमाथिको कानूनी कारबाहीमा कुनै किसिमिको कमजोरी हुन नदिने दाबी गरे ।