राजविराज नगरपालिकाद्वारा कृषकलाई कृषि उपकरण र विउ विजन वितरण

राजविराज । राजविराज नगरपालिकाले कृषकलाई आत्मनिर्भर बनाउँदै उनीहरूको आम्दानी अभिवृद्धि गर्ने उद्देश्यले सीपमूलक तालिमसहित विभिन्न कृषियन्त्र, उपकरण तथा विउ विजन निःशुल्क वितरण गरेको छ ।

मंगलवार नगरपालिका कार्यालय परिसरमा आयोजित एक कार्यक्रममार्फत वडा नं. १० र १६ का २४/२४ जना गरी ४८ जना किसानलाई औषधी छर्कने ठूलो पम्प, पानी तान्ने मोटर, तथा विभिन्न प्रकारका विउ विजन वितरण गरिएको हो ।

कार्यक्रममा कार्यवाहक नगरप्रमुख इसरत परवीनले वैकल्पिक सिँचाइको व्यवस्था, श्रमिक अभावको समाधान, उत्पादन लागतमा कमी ल्याउने र किसानलाई प्रविधिमैत्री बनाउने उद्देश्यले यो कार्यक्रम सुरु गरिएको जानकारी दिइन् ।

उनले भनिन्, “यो कार्यक्रम आर्थिक वर्ष २०८१/८२ को स्वीकृत योजना अन्तर्गत संचालनमा ल्याइएको हो, जसलाई क्रमशः नगरका सबै १६ वटै वडामा विस्तार गरिनेछ ।”

नगरपालिकाले निर्वाहमुखी खेती गर्दै आएका किसानलाई व्यवसायिक कृषिमा रूपान्तरण गर्न तालिमपछि मात्र प्रविधि तथा विउ विजन प्रदान गरेको हो। तालिममा किसानलाई लघुकर्जा, उद्यमशीलता विकास, बजारीकरण र आधुनिक कृषि प्रणालीसम्बन्धी विषयमा जानकार बनाइएको थियो ।

परवीनले विश्वास व्यक्त गर्दै भनिन्, “यो कार्यक्रमबाट किसानलाई खेती गर्न थप सहजता हुने छ, जसले उनीहरूको जीवनस्तर उकास्न सहयोग पुर्‍याउनेछ ।”

सात दिनसम्म सञ्चालन गरिएको उक्त तालिममा कृषिविज्ञ हरिनारायण यादव, सुनिल यादव, उद्यम विकास सहजकर्ता मनिषा चौधरी, कमली शर्मा तथा सिदार्थ बैंक र लक्ष्मी सनराइज बैंकका प्रतिनिधिहरुले विभिन्न विषयमा प्रशिक्षण दिएका थिए ।