खडकमा समुन्नति कार्यक्रम बालबालिकाका लागि प्रभावकारी बन्दै

सप्तरी । सप्तरीको खडक नगरपालिकामा बालबालिकाको समग्र विकासका लागि सञ्चालन गरिएको समुन्नति कार्यक्रम प्रभावकारी बन्दै गएको छ ।

खडक नगरपालिकाको समन्वयमा सेभ द चिल्ड्रेन र सबल नेपालले सप्तरीको पश्चिमी भेगमा सञ्चालन गरेको बालबालिकाको विकासमा आधारित समुन्नति कार्यक्रम फलदायी देखिएको हो ।

नगर कार्यक्रम सल्लाहकार समितिद्वारा गरिएको अनुगमन तथा समीक्षा बैठकका क्रममा खडक नगरपालिकाका विभिन्न वडामा सम्पन्न गतिविधिहरूको अवलोकन गरिएको थियो । शिक्षा, स्वास्थ्य तथा जीविकोपार्जन क्षेत्रमा गरिएको सहयोगले बालबालिकासँगै उनीहरूका परिवार र समुदायको विकासमा महत्वपूर्ण टेवा पुगेको पाइएको छ ।

अनुगमनका क्रममा खडक नगरपालिका वडा नम्बर ५ खोजपुरस्थित स्वास्थ्य चौकी अन्तर्गत सञ्चालनमा रहेको प्रसूति गृहका लागि सबल नेपालले उपलब्ध गराएका उपकरणहरू प्रभावकारी रूपमा प्रयोग भइरहेको पाइएको छ ।

स्वास्थ्य चौकी खोजपुरकी इन्चार्ज बिन्दु यादवका अनुसार बर्थिङ सेन्टर सञ्चालनका लागि सबल नेपालले उपलब्ध गराएको पीपी सेट, सेनिटाइजर, टायल जडान, फिट निर्माणलगायत विभिन्न उपकरणहरूको सहयोगबाट केन्द्र सञ्चालनमा आएको हो । उनले यस बर्थिङ सेन्टरमा मासिक ३ देखि ४ शिशुको जन्म हुने गरेको र नियमित सरसफाइ भइरहेको जानकारी दिइन् ।

यद्यपि, बर्थिङ सेन्टर सञ्चालनका क्रममा स्वास्थ्यकर्मी बस्नका लागि कोठाको अभाव तथा विद्युत् व्यवस्थापन नहुँदा केही कठिनाइ भोग्नुपरेको उनले बताइन् ।

यसैगरी, स्वास्थ्य चौकीमा सरसफाइ, गर्भवती महिलाको स्याहार तथा किशोर–किशोरीका लागि सञ्चालन गरिएका मैत्रीपूर्ण कार्यक्रमहरू प्रभावकारी रहेको खडक नगरपालिकाको महिला, बालबालिका तथा ज्येष्ठ नागरिक शाखाकी अनिता चौधरीले जानकारी दिइन् ।

अनुगमनकै क्रममा खडक नगरपालिका वडा नम्बर १ स्थित वडा कार्यालयमा बालअधिकार संरक्षण समितिले तयार पारेको वार्षिक कार्ययोजना, समुदायमा रहेका बालबालिकालाई सामग्री वितरण, प्रशिक्षण, तालिम तथा विभिन्न क्रियाकलापबारे जानकारी लिइएको थियो ।

वडा नम्बर १ का वडा अध्यक्ष राजकुमार साहले विभिन्न विद्यालयमा बालबालिकालाई पोसाक वितरण गरिएको तथा समय–समयमा विद्यालय निरीक्षण गरी आवश्यक सहयोग गर्दै आएको जानकारी दिए । उनले समुदाय तथा विद्यालयमा बालबालिकालाई कुलतबाट जोगाउन लागुऔषध दुरुपयोग, बालश्रमलगायत विषयमा तालिममार्फत जनचेतना जगाइएको बताउँदै यसको सकारात्मक प्रभाव देखिएको बताए ।

यसैगरी, खडक नगरपालिका वडा नम्बर ४ स्थित बागेश्वरी आधारभूत विद्यालय अमहा तथा वडा नम्बर ५ स्थित जनता राष्ट्रिय आधारभूत विद्यालयमा मर्मतसम्भार, रंगरोगन, खानेपानीका लागि फिल्टर सेट, शौचालय निर्माण तथा हरित विद्यालयका सूचक पूरा गर्न सबल नेपालले सहयोग गरेको जनाइएको छ ।

खर्चुहिया आधारभूत विद्यालयका प्रधानाध्यापक दिनेश मण्डलका अनुसार बालविकास कक्षाका लागि सामग्री, शिक्षकहरूलाई शिक्षण–सिकाइ तालिम, शैक्षिक सामग्री तथा विभिन्न प्रशिक्षणमा समेत सहयोग गरिएको छ ।

उक्त अनुगमनमा खडक नगरपालिका वडा सदस्य गंगाराम चौधरी, वडा नम्बर १ का अध्यक्ष राजकुमार साह, वडा नम्बर ५ का सदस्य रामबिलास मण्डल, स्वास्थ्य शाखा प्रमुख जीवनारायण साह, महिला बालकल्याण अधिकारी अनिता कुमारी साह, रोजगार शाखा प्रमुख प्रकाश चौधरी, कृषि शाखा प्रमुख राजेश चौधरी, सबल नेपालका उपाध्यक्ष भुपेश साह, फिल्ड म्यानेजर रोशन कुमार मण्डल, फिल्ड संयोजक अशोक कुमार साह, राधेश्याम राम, अनुगमन संयोजक चन्दन चौधरी, पत्रकारहरू चन्दन कुमार यादव, महेश सिंह र आशिष साहलगायतको सहभागिता रहेको थियो ।