सप्तरीका मिटर ब्याजी आरोपित दिदी भाई थुनामा

राजविराज। मिटरब्याजी कारोबारका मुख्य आरोपी सप्तरीका रामदेव साह तेलीका छोरा र छोरी पुर्पक्षका लागि थुनामा पुगेका छन।

सप्तरी जिल्ला अदालतका न्यायाधीश सूर्यनाथ प्रकाश अधिकारीको इजलासले ४४ वर्षीय नन्दकिशोर साह र उनकी दिदी अनुराधा साहलाई पुर्पक्षका लागि राजविराज कारागारमा थुनामा पठाएको अदालतले जानकारी दिएको छ। मिटरब्याजी खडक नगरपालिका कल्याणपुरका रामदेव साह तेलीको खोजीमा रहेको सप्तरी प्रहरीले उनका छोरा नन्दकिशोर लाई धरान बजारबाट र अनुराधालाई काठमाडौँ बाट पक्राउ गरेको थियो।

सप्तरीका विपन्न नागरिकको उठीबास लगाएर फरार रहेका मिटरब्याजी रामदेव साह हाल सम्म पक्राउ परेका छैनन् । रामदेव सहित अन्य ६ जना फरारको खोजी भइरहेको छ भने आरोपित विरुद्ध सप्तरीका १७ जनाले उजुरी दिएका थिए। प्रधानमन्त्री शेरबहादुर देउवाले मिटरब्याजी रामदेवलाई तत्काल पक्राउ गरेर अनुसन्धान अगाडि बढाउन गृहमन्त्री बालकृष्ण खाणलाई निर्देशन दिएपछि प्रहरी सक्रिय भई उजुरी दर्ता गरेको हो ।

पीडितले तीन महिना अघि नै उजुरी दिए पनि बेवास्ता गर्दै आएको सप्तरी प्रहरीले प्रधानमन्त्री र गृहमन्त्रीको निर्देशन पछि कारोबारीलाई पक्राउ गरेर कारबाही अगाडि बढाएको हो । पीडितले ठगी तथा आपराधिक विश्वासघात गरेको भन्दै साहुकार रामदेव सँगै उनकी श्रीमती शिवकुमारी, छोरा नन्दकिशोर, छोरीहरू रेणुकुमारी र अनुराधा, नाति २१ वर्षीय चन्दनकुमार र धनुषा खरिहानी टोल बस्ने कैलाश साह लगायत विरुद्ध इलाका प्रहरी कार्यालय कल्याणपुरमा तीन महिना अघि उजुरी दिएका थिए ।

मिटरब्याजी रामदेवबाट रु १० लाख ऋण लिएकी शम्भुनाथ नगरपालिका–२ रामपुर–जमुवाकी महिलाले ब्याज मिनाहा पाउने आश्वासनमा यौन शोषणको सिकार समेत भएको भन्दै प्रहरीमा उजुरी दिएकी छन् । पीडितका अनुसार रु १० लाख ऋणको साहुकार रामदेवले रु ३२ लाख असुलेर यौन शोषण समेत गरेका छन् ।

सहमति दिएपछि साहुकार रामदेव सँग रु १० लाख ऋण लिएर पीडितले सात कठ्ठा ११ धुर जग्गा किनेका थिए । नयाँ किनेको जमिन सहित उनको नाममा रहेको सबै जग्गा साहुकारले ऋण तिरेपछि फिर्ता हुने गरी आफ्नो नाममा राखेका छन् । वैदेशिक रोजगारमा रहेका श्रीमानले पठाएको पैसा साहुकार तेलीलाई तिर्दै गए पनि जग्गा फिर्ता नपाएको पीडितले बताएको छ ।

ऋण तिरेपछि सबै जग्गा फिर्ता गर्ने भनेका तेलीले रु १० लाखको रु ३२ लाख असुले पनि जग्गा फिर्ता नगरेको पीडितले बताए । ब्याज धेरै भयो भन्दै मिनाहा गर्ने नाममा बारम्बार बलात्कार गरेको पीडितले बताएका छन् । न्यायका लागि गत मङ्सिर १२ गते पुगेकी पीडितलाई जिल्ला प्रहरी कार्यालयले इलाका प्रहरी कार्यालय कल्याणपुर पठाए पनि कल्याणपुर प्रहरीले ढिलो भएको भन्दै उजुरी लिन नमानेको पीडितले बताए । उनले मङ्सिर १३ गते जिल्ला हुलाक कार्यालय मार्फत जिल्ला प्रहरी कार्यालयमा जाहेरी पठाएको मा कारबाही अगाडि नबढे पछि पुस २१ गते उच्च अदालत जनकपुर राजविराज इजलासमा परमादेशका लागि निवेदन दिएका थिए । उच्च अदालत जनकपुर राजविराज इजलासले जिल्ला प्रहरी कार्यालय सप्तरीलाई पीडितको उजुरी दर्ता गर्न परमादेश दिएको थियो ।

न्यायाधीशद्वय नातिबाबु लामिछाने र मदन पोखरेलको संयुक्त इजलासले पीडितलाई झिकाई निजले दिएको जाहेरी सनाखत गराई निकासा दिनु भनेर प्रहरीका नाममा परमादेश गरेको थियो । गृहमन्त्रालायको निर्देशन पछि गम्भीर बनेको सप्तरी प्रहरीले मिटरब्याजी साहुकार तेलीले विपन्न ९ जना नागरिक माथि ज्यादती गरेको घटना पत्ता लागेको जनाएको छ । सप्तरीमा मिटरब्याजी बाट पीडित क्रमशः सार्वजनिक हुँदै गएको कारबाहीको उजुरी थपिँदै गएको छ।