वर्तमान सरकार भ्रष्ट, निष्पक्षढंगले निर्वाचन गराउन चाहेका छैन : केपी ओली

चन्दन यादव, राजविराज, १५ असोज । नेकपा एमाले अध्यक्ष केपी शर्मा ओलीले वर्तमान सरकार भ्रष्ट रहेको र निष्पक्षंगले निर्वाचन गराउन नचाहेको आरोप लगाएका छन् ।

राष्ट्रिय युवा संघ नेपालको मधेश प्रदेशस्तरीय निर्वाचन परिचालन कमिटी घोषणा तथा आमसभालाई शनिवार सप्तरीको सिमरामा सम्बोधन गर्दै अध्यक्ष ओलीले यस्तो आरोप लगाएका हुन् । प्रमुख प्रतिपक्षी दल अध्यक्ष समेत रहेका ओलीले गठबन्ध सरकारले १४ महिनामा कुनै खास काम गर्न नसकेको आरोपसमेत लगाए।

नेपालको सिमा मिचिएको सम्बन्धमा पनि सरकारले चु सम्म बोल्न नसेकेको बताउँदै उनले अहिलेको सरकार नक्कली भएको बताए । आफ्नो नेतृत्वको सरकारलाई धाँधलीपूर्वक हटाएको बताउँदै अध्यक्ष ओलीले देउवा सरकार निष्पक्ष चुनाव गर्न नखोजेका ले सरकारको गलत निर्देशनलाई पालना नगर्न सुरक्षानिकायलाई आग्रहसमेत गरे । अध्यक्ष ओली ६ वर्षअघि मलेठ घटनापछि पहिलो पटक शनिवार सप्तरी आएका हुन् ।

सभामा पुर्व प्रतिनिधि सभा सदस्य सरिता गिरी यादवले बेथितिको अन्त गर्न र देशमा सुशासन कायम गर्नका लागि नेकपा एमालेले सरकारको नेतृत्व गर्नुपर्ने बताइन् । यस्तै नेकपा एमाले नेता दिवाकर देवकोटाले गरिब, विपन्न, किसान, शोषित, पीडित तथा मजदुरको हक अधिकारका लागि नेकपा एमालेको सरकार बनाउन जरुरी रहेको बताए । राष्ट्रिय युवा संघका अध्यक्ष किरण पौडेलले मधेशवादी दलले मधेशी जनताको भावनालाई बुझ्न नसकेको र मधेश प्रदेश सरकार भ्रष्टाचारका अखडा बन्दै गएको आरोप लगाए । मधेशको बेथिति, बेरोजगारीलाई कसैले नहेरेको बताउँदै उनले मधेशी दलले जनतालाई गरिब बनाएको र आफू धनी बनेको दाबी गरे ।

युवा नेता महेश बस्नेतले मधेशवादी दलले सतामा पुग्दा श्रीमतीलाई मन्त्री बनाउने, आफन्तलाई सासंद बनाउने जस्ता काम गरेको आरोप लगाए । बेटी पढाउ, बेटी बचाउ कार्यक्रममा भष्ट्राचार गरी मधेशी जनतालाई ठग्ने काम मधेस सरकारले गरेको उनको आरोप थियो ।

आमसभामा विभिन्न पार्टी परित्याग गरी एमालेमा प्रवेश गर्नेहरूलाई अध्यक्ष ओलीले स्वागत गरेका थिए । यसअघि सप्तरीमा विभिन्न पार्टीका केही शीर्षस्थ नेताहरू पनि एमालेमा प्रवेश गर्ने र त्यसकै लागि शनिवारको आम सभा आयोजना गरिएको चर्चा रहेपनि त्यस्तो खासै हुन सकेन ।