अमरनाथ झा स्मृति पुरस्कार ओम नारायण र पल्लवीलाई प्रदान गरिने

राजविराज । श्री पब्लिक माध्यमिक विद्यालय लौनियाँ तिलाठीका पूर्व प्रधानाध्यापक अमरनाथ झाको सम्झनामा स्थापना गरिएको ‘अमरनाथ झा स्मृति पुरस्कार’ यस वर्ष जनता माध्यमिक विद्यालय तोपाका छात्र ओम नारायण यादव र पब्लिक माध्यमिक विद्यालय लौनियाँ तिलाठीकी छात्रा पल्लवी ठाकुरलाई प्रदान गरिने भएको छ ।

अमरनाथ झा मेमोरियल ट्रष्टका प्रमुख कार्यकारी अधिकृत प्रवेश कुमार मिश्रले आइतबार प्रेस विज्ञप्ति जारी गर्दै पुरस्कार सम्बन्धी जानकारी दिएका छन् ।

पुर्व शिक्षक दयाकान्त झाको अध्यक्षतामा गठन भएको चयन समितिले गाउँपालिकाभित्रका सबै सामुदायिक विद्यालयका एसईई परीक्षामा उत्कृष्ट अंक ल्याएका यी दुई विद्यार्थीलाई पुरस्कारको लागि सिफारिस गरेको थियो ।

ट्रष्टले यस वर्षको पुरस्कार राशि ५१ हजार बराबर भागमा बाँडेर दुवै विद्यार्थीलाई प्रदान गर्ने जनाएको छ । पुरस्कार वितरण कार्यक्रम भदौ २३ गते सोमबार, तिलाठी कोइलाडी गाउँपालिकाको सभाहलमा आयोजना हुनेछ ।

ट्रष्टका प्रमुख कार्यकारी अधिकृत मिश्रका अनुसार स्मृति पुरस्कारले भावी पुस्तालाई शिक्षा क्षेत्रमा उत्कृष्टता हासिल गर्न प्रेरणा दिने विश्वास लिइएको छ । कार्यक्रममा शिक्षाप्रेमी, समाजसेवी, सञ्चारकर्मी, बुद्धिजीवी, जनप्रतिनिधि र ट्रष्टका शुभेक्षुकलाई सहभागिताको लागि आग्रह गरिएको छ ।