महिला क्रिकेट : मोरंग र सिरहा बीच उपाधि निर्णायक खेल भोलि हुने

राजविराज । राजविराजमा जारी जिल्ला स्तरीय इन्टर–हब महिला टी–२० क्रिकेट प्रतियोगितामा मोरंगले उत्कृष्ट प्रदर्शन गर्दै फाइनलमा स्थान सुरक्षित गरेको छ ।

बुधबार राजविराजस्थित पविमावि खेल मैदानमा सम्पन्न लिग चरणको निर्णायक खेलमा मोरंगले सिरहालाई ६९ रनको फराकिलो अन्तरले पराजित गर्दै उपाधि प्रतिस्पर्धाको यात्रा तय गरेको हो ।

सप्तरी क्रिकेट संघको समन्वय र सबल नेपालको आयोजनामा सञ्चालन भइरहेको प्रतियोगितामा टस जितेर पहिले ब्याटिङ गरेको मोरंगले निर्धारित २० ओभरमा ९ विकेटको क्षतिमा १६३ रनको चुनौतीपूर्ण योगफल तयार पारेको थियो । लक्ष्य पछ्याएको सिरहा टोली २० ओभरमा ५ विकेट गुमाउँदै ९४ रनमै सिमित रह्यो ।

मोरंगकी सुबेक्षा लिम्बुले उत्कृष्ट प्रदर्शन गर्दै प्लेयर अफ द म्याच घोषित भइन् । उनलाई समाजसेवी खेलानन्द दासले ट्रफी प्रदान गरे ।

यसअघि सिरहा अंकको आधारमा फाइनलमा प्रवेश गरिसकेको थियो। भोलि हुने फाइनल खेलमा मोरंग र सिरहा बीच उपाधिका लागि प्रतिस्पर्धा हुने सबल नेपालका कार्यक्रम संयोजक नवनित जायसवालले जानकारी दिए ।

उक्त प्रतियोगिताअन्तर्गत आज सम्पन्न अर्को खेलमा सप्तरीले धनुषालाई ८ विकेटले पराजित गरेको छ । टस जितेर पहिले ब्याटिङ गरेको धनुषाले २० ओभरमा ९ विकेट गुमाएर ६० रनको योगफल बनाएको थियो । जवाफमा सप्तरीले ८ ओभर २ बलमै २ विकेटको क्षतिमा लक्ष्य पार गर्दै सहज जित हात पारेको थियो ।

सप्तरीकी दीपा राम प्लेयर अफ द म्याच घोषित भइन्। उनलाई पूर्व अन्तर्राष्ट्रिय खेलाडी राजकुमार प्रधानले ट्रफी र मेडल प्रदान गरे ।

सबल नेपालको आयोजनामा जारी प्रतियोगिताले प्रदेश नम्बर २ (मधेस प्रदेश) का जिल्लाका महिला क्रिकेटरहरूलाई खेलकुदमा सशक्तिकरण र अवसर विस्तारमा सहयोग पु-याइरहेको आयोजकले जनाएको छ ।