राजबिराजमा सम्पन्न महिला क्रिकेट प्रतियोगिता मोरङले जित्यो

राजबिराज । सप्तरी क्रिकेट संघको समन्वय र सबल नेपालको आयोजनामा राजबिराजमा सम्पन्न जिल्ला स्तरिय महिला इन्टर हब टी–ट्वान्टी क्रिकेट प्रतियोगिताको उपाधि मोरङले हात पारेको छ ।

बिहीबार राजबिराजस्थित पविमावि खेलमैदानमा भएको फाइनल खेलमा मोरङले सिरहालाई ७ विकेटले पराजित गर्दै उपाधि उचालेको हो ।

टस जितेर पहिले ब्याटिङ गरेको सिरहाले १४ ओभर ४ बलमा सबै विकेट गुमाउँदै ४६ रनको सानो योगफल खडा गरेको थियो । सिरहाका लागि अनुराधा चौधरीले नटआउट २६ रन बनाइन् भने सात जना खेलाडी शून्य रनमै आउट भएका थिए। अन्य खेलाडीहरू दोहोरो अंक पार गर्न सकेनन् ।

बलिङतर्फ मोरङकी श्रृजना राजबंशीले उत्कृष्ट प्रदर्शन गर्दै ३ विकेट लिइन् । निरु राजबंशीले २ विकेट, सुबेक्षा लिम्बू, बन्दना राजबंशी र पूर्णिमा राजबंशीले प्रत्येकी १/१ विकेट हात पारे ।

४७ रनको लक्ष्य पछ्याउँदै मोरङले ८ ओभरमा ३ विकेटको क्षतिमा सहज जित हासिल गर्‍यो । मोरङकी प्रिन्सा रानामगरले नटआउट १५ रन, खुशी राजबंशीले नटआउट ११ रन र टीका साहले १० रन योगदान गरिन् ।

बलिङतर्फ सिरहाका लागि सरस्वती चौधरीले २ विकेट र मिना महतोले १ विकेट लिइन् । प्रतियोगिताको प्लेयर अफ द फाइनल मोरङकी श्रृजना राजबंशी घोषित भइन् । त्यस्तै बेस्ट ब्याटर मोरङकी टीका साह, बेस्ट बलर सप्तरीकी सुस्मिता यादव र प्लेयर अफ द सिरिज सिरहाकी सरस्वती चौधरी घोषित भइन् ।

समापन समारोहमा प्रमुख जिल्ला अधिकारी टुवराज पोखरेल, सबल नेपालका सिनियर म्यानेजर अशोक साह, सप्तरी क्रिकेट संघका उपाध्यक्ष निरज सिंह, सबल नेपालका कार्यक्रम संयोजक नवनित जायसवाल, संघका सदस्य संजय कार्की र धर्मेन्द्र चौधरीलगायतका अतिथिहरूले विजेता तथा उपविजेता टिमलाई शिल्ड, कप र प्रमाणपत्र वितरण गरेका थिए ।