चन्दन यादब 
राजविराज । स्थित बोरियामा ९ वर्षअघि जडान गरिएको डिप बोरिङ अहिलेसम्म सञ्चालनमा नआउँदा स्थानीयवासीहरू ठूलो समस्यामा परेका छन् ।
पानीको अभाव भइरहेका बेला डिप बोरिङ सञ्चालनमा नआउँदा सयौं बिगाहा खेतीयोग्य जमिनमा सिँचाइ हुन नसकेको र त्यसले गर्दा जमिन बाँझै बस्नुपरेको स्थानीयको गुनासो छ ।
राजविराज नगरपालिका र वडा कार्यालयको लापरवाहीका कारण बोरिङ सञ्चालन नहुनु स्थानीय किसानहरूका लागि पीडादायी भएको छ ।
“जडान भएको ९ वर्ष बितिसक्यो। तर राजनीतिक हस्तक्षेप र कमिसनको चलखेलका कारण अहिलेसम्म बोरिङ सञ्चालनमा आउन सकेको छैन,” स्थानिय बासिन्दा रामु यादव भन्छन् ।
यस विषयमा राजविराज–१६ का वडा अध्यक्ष रामएकवाल यादवले बोरिङ सञ्चालनका लागि पाइप ओछ्याउने कामलगायत अन्य केही कार्य बाँकी रहेको बताए। साथै, लहान सिँचाइ डिभिजन कार्यालयले चाँडै निरीक्षण गरी काम अघि बढाउने जानकारी समेत उनले दिएका छन् ।
हामी क्षमा चाहन्छौं यो पोस्ट धेरै पुरानो भएको ले कमेन्ट बक्स बन्द गरेको छौं |