समुदायमा लोकप्रिय बन्दै समुन्नति कार्यक्रम

राजविराज । सबल नेपाल र सेभ द चिल्ड्रेनको संयुक्त साझेदारीमा सञ्चालित ‘समुन्नति कार्यक्रम’ सप्तरीको पश्चिमी क्षेत्रका समुदायहरूमा लोकप्रिय बन्दै गएको छ ।

सुरूगां नगरपालिका र खडक नगरपालिकामा सञ्चालित यस कार्यक्रमअन्तर्गत शिक्षा, स्वास्थ्य, रोजगारी लगायतका क्षेत्रमा उल्लेखनीय उपलब्धि हासिल भएका छन् ।

सुरूगां नगरपालिका–१, पिप्रापश्चिममा निर्माण सम्पन्न बर्थिङ सेन्टरमा सबल नेपालले आवश्यक सम्पूर्ण सामग्री सहयोग गरेपछि स्थानीय मात्र होइन, छिमेकी जिल्ला उदयपुर–गाईघाटसम्मका सुत्केरी महिलाहरू सेवा लिन आउन थालेका छन् । डेलिभरी किट, बेबी वार्मर, डेलिभरी बेड, प्लासेन्टापिट लगायतका सामग्री समेटिएको झन्डै १५ लाख रुपैयाँ बराबरको सहयोग समुन्नति कार्यक्रममार्फत गरिएको हो, भनी सबल नेपालका कार्यक्रम संयोजक रोशन मण्डलले जानकारी दिए ।

यसैबीच, बिहीबार सुरूगां नगरपालिकाका वडा नं. १, ५, ६ र ७ मा सञ्चालित विभिन्न कार्यक्रमको नगर परियोजना सल्लाहकार समितिबाट अनुगमन तथा निरीक्षण गरिएको छ ।

रोजगार सिर्जना गर्ने उद्देश्यले सुरूगां र खडक नगरपालिकाका १२ जना युवायुवतीलाई ६५ दिनको ‘फास्ट फुड कुक’ तालिम दिइएको छ ।  सुरूगां नगरपालिका–५ मा सञ्चालित तालिममा चाउमिन, अण्डा करी, म:म:, बिरयानी, लिट्टी, समोसा आदि परिकार बनाउने सीप सिकाइएको छ । सीटीईवीटीबाट मान्यता प्राप्त प्रशिक्षकमार्फत तालिम दिइएको हो ।

सीप प्राप्त युवायुवतीहरूलाई स्वरोजगारमार्फत आत्मनिर्भर बनाउने र आम्दानीबाट आफ्ना छोराछोरीको शिक्षामा सहयोग पुर्‍याउने उद्देश्यले तालिम सञ्चालन गरिएको मण्डलले बताए ।

यसैगरी, अनुगमन टोलीले सुरूगां नगरपालिका–१, शिशुवारीस्थित नमूना बाल क्लबद्वारा तयार पारिएको बाल पत्रिका तथा अन्य बाल गतिविधिहरूको अवलोकन गरेको छ। साथै, बाल विकास कक्षा निर्माण, खानेपानीको व्यवस्था, शैक्षिक सामग्री वितरण तथा शिक्षक–अभिभावक प्रशिक्षणको कार्यहरू पनि सञ्चालन भइरहेका छन् ।

जिविकोपार्जनका लागि दुई पालिकाका ९ कृषक समूहका २०० कृषकलाई क्षमता विकास तालिम, बीउ–बिजन वितरण गरिएको छ । कृषकहरूले बेमौसमी खेतीमार्फत वार्षिक लाखौं आम्दानी गर्न थालेका छन्। साथै, विपन्न परिवारहरूलाई लिजमा जग्गा उपलब्ध गराई खेतीमार्फत जीविकोपार्जन गर्न सबल नेपालले सहयोग गर्दै आएको छ।

कार्यक्रमहरूको अवलोकनका क्रममा शिक्षा विकास तथा खेलकुद इकाई प्रमुख भोगेन्द्र यादव, स्वास्थ्य शाखा प्रमुख दशरथ चौधरी, सेभ द चिल्ड्रेनका सिनियर कार्यक्रम संयोजक मकर बहादुर सार्की, महिला विकास शाखा प्रमुख रिंकु यादव, सिनियर अहेव भूषण सुनारैत, उद्यम विकास शाखा प्रमुख विजय चौधरी, सबल नेपालका उपाध्यक्ष भूपेश साह, राधेश्याम राम, अशोक कुमार साह, चन्दन चौधरी, नगर बाल सञ्जालका अध्यक्ष देव कुमार साह, सदस्य प्रनिषा पाण्डे लगायतको उपस्थिति रहेको थियो ।