भूषण सिहं 
राजविराज । सप्तरी जिल्लामा राष्ट्रिय परिचयपत्र सेवा लिने सेवाग्राहीको अत्यधिक भीड तथा प्रणालीमा देखिएको अवरोधलाई ध्यानमा राख्दै जिल्ला प्रशासन कार्यालयले सेवा प्रवाहमा नयाँ तालिका लागू गर्ने भएको छ । अब सेवाग्राहीहरूले आफ्ना पालिकाअनुसार निर्धारण गरिएको दिनमा मात्र सेवा लिन सक्नेछन् ।
बैंक, वित्तीय संस्था तथा सामाजिक सुरक्षा भत्ता लगायतका सरकारी कामकाजमा राष्ट्रिय परिचयपत्र अनिवार्य गरिएको कारण सेवाग्राहीको चाप दिनप्रतिदिन बढ्दै गएको र सिस्टममा समेत समस्या देखिन थालेपछि यस्तो तालिकाबद्ध सेवा प्रणाली ल्याइएको हो ।
प्रशासन कार्यालयका अनुसार यो व्यवस्था आगामी बुधवार, २०८२ साउन २१ गतेदेखि लागू हुनेछ । सेवाग्राहीहरूलाई तोकिएको दिनमा मात्र कार्यालयमा उपस्थित हुन एक सूचना जारी गर्दै जानकारी दिइएको छ ।
यस तालिकाअनुसार, आइतवार, सोमवार र मंगलवार शम्भुनाथ नगरपालिका, सुरुङ्गा नगरपालिका, खड्क नगरपालिका, हनुमाननगर कंकालिनी नगरपालिका, रुपनी गाउँपालिका, तिरहुत गाउँपालिका र तिलाठी कोइलाडी गाउँपालिकाका नागरिकहरूले सेवा लिन सक्नेछन् ।
त्यसैगरी, बुधवार, बिहिवार र शुक्रबार महदेवा गाउँपालिका, डाक्नेश्वरी नगरपालिका, अग्नीसाइर कृष्णासवरण गाउँपालिका, राजविराज नगरपालिका, राजगढ गाउँपालिका, बिष्णुपुर गाउँपालिका र छिन्नमस्ता गाउँपालिकाका सेवाग्राहीका लागि सेवा उपलब्ध गराइनेछ ।
साथै, इलाका प्रशासन कार्यालय बोदेर्बसाइन र कंचनपुर क्षेत्रभित्र पर्ने पालिका तथा वडाहरूले राष्ट्रिय परिचयपत्रसम्बन्धी सेवा सोही इलाका कार्यालयबाट लिनुपर्ने कार्यालयले स्पष्ट पारेको छ ।
हामी क्षमा चाहन्छौं यो पोस्ट धेरै पुरानो भएको ले कमेन्ट बक्स बन्द गरेको छौं |