मैथिली साहित्य परिषद्को पुर्व अध्यक्ष झाको अन्त्येष्टि, महासंघद्वारा अन्तिम श्रद्धाञ्जली अर्पण

राजविराज । दिवङ्गत मैथिली साहित्य परिषद् राजविराजको पुर्व अध्यक्ष तथा नेपाल पत्रकार महासंघ सप्तरीका पूर्व कोषाध्यक्ष शुभचन्द्र झाको अन्तिम संस्कार गरिएको छ ।‌ बिहीबार हनुमाननगर कंकालिनी नगरपालिका-१ स्थित सप्तकोशी नदी किनारमा उनको अन्तिम संस्कार गरिएको हो ।

यसअघि उनको निवास राजविराज पुगी दिवङ्गत झाप्रति नेपाल पत्रकार महासंघ शाखा सप्तरी अध्यक्ष श्रवण देव, उपाध्यक्ष अम्विका दाहाल, सचिव राम नारायण विश्वास, मैथिली साहित्य परिषदका अध्यक्ष अवधेश झा, पूर्वअध्यक्ष सतिश दत्त, मैथिली साहित्य कला प्रतिष्ठान (मिलाफ) का अध्यक्ष रमिला साह लगायतले अन्तिम श्रद्धाञ्जली अर्पण गरेका थिए ।

उनको अन्त्येष्टिमा आम सञ्चार प्राधिकरण मधेश प्रदेशका अध्यक्ष श्याम सुन्दर यादव, मैथिली साहित्य परिषद्का सदस्य राजिव झा, मिथिला साप्ताहिक पत्रिकाका सम्पादक जितेन्द्र कुमार झा, महासंघका कार्यसमिति सदस्य विद्यानन्द राम लगायतका व्यक्तिहरू सहभागी रहेका थिए ।

केही दिनयता बिरामी रहेको झाको बुधबार उपचारको क्रममा अस्पतालमै मृत्यु भएको थियो । स्वर्गीय झा मिथिला साप्ताहिक पत्रिकाको प्रकाशन संस्था मैथिली मिडिया प्रालीका अध्यक्ष पनि थिए । उनकै प्रकाशनमा मैथिली भाषाको सूर्यांश साप्ताहिक पत्रिका राजविराज बाट प्रकाशित भइरहेको छ । स्वर्गीय झाको पत्नी, एक छोरा र तीन छोरी रहेको छ ।