चन्दन यादब 
राजबिराज । महेन्द्र विन्देश्वरी बहुमुखी (मविब) क्याम्पस राजबिराजमा आगामी चैत ५ गते हुने स्वतन्त्र विद्यार्थी युनियन (स्ववियु) निर्वाचनका लागि अब जम्मा दुई दिन बाँकी रहँदा चुनावी सरगर्मी चरमोत्कर्षमा पुगेको छ ।
जसपा नेपाल निकट समाजवादी विद्यार्थी युनियन नेपालबाट अध्यक्ष पदका उम्मेदवार रंजित कुमार यादबले क्याम्पसको गुणस्तरीय शिक्षामा सुधार सहित आफ्नो २१ बुँदे प्रतिबद्धता पत्र सार्वजनिक गरेसँगै उनको पक्षमा बलियो जनलहर देखिएको छ । उनी मबिव क्याम्पसको स्ववियु अध्यक्ष पदमा रहँदै विद्यार्थी हकहित सँगै क्याम्पसको शैक्षिक सुधार, नियमित कक्षा संचालन, गुणस्तर शिक्षा तथा भौतिक पूर्वाधारमा गरेको कार्य, पहलले उनको पक्षमा विद्यार्थीको माहोल बन्दै गएको छ ।
रंजित कुमार यादबको नेतृत्वमा समाजवादी विद्यार्थी युनियन र नेकपा (माओवादी केन्द्र) निकट अखिल (क्रान्तिकारी) को संयुक्त गठबन्धन प्यानल बलियो अवस्थामा देखिन्छ ।
यता समाजवादी विद्यार्थी युनियन नेपालका रंजित कुमार यादब, नेपाली काँग्रेस निकट नेबि सँघले नितिश कुमार यादब र नेकपा एमाले निकट अखिल नेपाल राष्ट्रिय स्वतन्त्र विद्यार्थी युनियन (अनेरास्ववियु) ले मनिषा कुमारी साह पनि अध्यक्ष उम्मेदवारका रूपमा मैदानमा उतारेका छन् ।
यसैगरी जनमत विद्यार्थी सँघवाट त्रिवेणी कुमार यादब र स्वतन्त्र उम्मेदवार बिनय कुमार यादब पनि अध्यक्षमा उम्मेदवारको रूपमा मैदानमा उतरेका छन । यता नेबि सँघ र लोकतान्त्रिक विद्यार्थी सँघले संयुक्त प्यानल बनाएर प्रतिस्पर्धामा रहेको छ भने अनेरास्ववियुले छुट्टै एक्लै प्यानल बनाएका छन ।
समाजवादी विद्यार्थी युनियनका रंजित यादब, नेबि सँघका नितिश कुमार यादब र अनेरास्ववियुका मनिषा कुमारी साह बिच त्रिपक्षीय प्रतिस्पर्धा कडा हुने अनुमान गरिए पनि विश्लेषकहरूले रंजित कुमार यादबले जित्ने सम्भावना बलियो रहेको दाबी गरेका छन् ।
रंजित कुमार यादब र उनको टिमले क्याम्पसको शैक्षिक गुणस्तर, पूर्वाधार विकास र विद्यार्थी सुविधालाई केन्द्रमा राखेर प्रतिबद्धता पत्र प्रस्तुत गरेका छन् ।
उनका मुख्य योजनाहरूमा दक्ष शिक्षक थप गरी प्रविधियुक्त शिक्षण विधि लागू गर्ने, ई-लाइब्रेरी र कम्प्युटर ल्याबको स्थापना गर्ने, स्किल ल्याब र साइन्स ल्याबलाई अत्याधुनिक बनाउने, नयाँ शैक्षिक भवन र होस्टेल निर्माणका लागि केन्द्रीय बजेट ल्याउने रहेको छ ।
यसबाहेक, उनले क्याम्पस हाता भित्र क्यान्टिनको व्यवस्थापन, शुद्ध खानेपानी व्यवस्थापन, स्वास्थ्यकर खानाको व्यवस्था, फ्री वाई-फाईको गति र कभरेज वृद्धि, मोटिभेसनल स्पिच, योगा र काउन्सिलिङ जस्ता अतिरिक्त क्रियाकलाप सञ्चालन गर्ने प्रतिबद्धता जनाएको छ ।
क्याम्पसमा निःशुल्क एम्बुलेन्स, प्राथमिक उपचार कक्ष, खेलमैदान र खेल सामग्रीको व्यवस्था, विद्यार्थी र अभिभावकका लागि सुविधायुक्त भिजिटर हल निर्माण र छात्रवृत्तिको व्यवस्थालाई पनि उनले प्राथमिकतामा राखेको छन् ।
अबको दुई दिनमा उम्मेदवारहरूको रणनीति र मतदाताको निर्णयले निर्वाचनको नतिजा निर्धारण गर्नेछ । रंजितको जनलहर कायम रह्यो भने उनी स्ववियुको नेतृत्वमा दोस्रो पटक पुग्ने बलियो आधार बनिसकेको छ । तर,नेबि सँघ र अनेरास्ववियुले अन्तिम समयमा कस्तो कदम चाल्छन्, त्यसले पनि प्रतिस्पर्धालाई रोचक बनाउन सक्छ । सबैको नजर अब चैत ५ को मतगणनामा अडिएको छ ।
हामी क्षमा चाहन्छौं यो पोस्ट धेरै पुरानो भएको ले कमेन्ट बक्स बन्द गरेको छौं |