राजबिराजमा नगरस्तरीय निबन्ध तथा हाजिरी जवाफ प्रतियोगिता सम्पन्न

राजबिराज । राजबिराज नगरपालिकाको आयोजनामा सोमबार एक दिवसीय नगरस्तरीय निबन्ध तथा हाजिरी जवाफ प्रतियोगिता सम्पन्न भएको छ। कार्यक्रम नगरपालिकाको सभाहलमा सम्पन्न भएको हो ।

उक्त प्रतियोगितामा राजबिराज नगर क्षेत्रभित्रका विभिन्न सामुदायिक विद्यालयहरूका छात्रछात्राहरूले सहभागिता जनाएका थिए । हाजिरी जवाफ प्रतियोगितामा के.ए. मावि राजबिराजले उत्कृष्ट प्रदर्शन गर्दै पहिलो स्थान प्राप्त गरेको छ । विद्यालयले नगद १० हजार रुपैयाँसहित ट्रफी र मेडल प्राप्त गरेको छ ।

त्यस्तै, दोस्रो स्थान पवित्र माविले प्राप्त गर्दै नगद ७ हजार रुपैयाँ, ट्रफी र मेडल जितेको छ भने तेस्रो स्थान महावीर मावि विषहरियाले हासिल गर्दै नगद ५ हजार रुपैयाँसहित ट्रफी र मेडल प्राप्त गरेको छ ।

प्रतियोगितामा सहभागी विद्यालयहरूमा पवित्र मावि, के.ए. मावि, राजदेवी मावि, विषहरिया मावि, मुसहरनिया मावि, नरेन्द्र मावि लगायत रहेका थिए । कार्यक्रम संयोजक अनिल यादवका अनुसार प्रतियोगिताले विद्यार्थीहरूमा आत्मविश्वास, ज्ञान तथा प्रतिस्पर्धात्मक क्षमता अभिवृद्धि गर्न सहयोग पुगेको छ ।

विजयी विद्यार्थीहरूलाई राजबिराज नगरपालिकाका कावा नगरप्रमुख ईसरत परविन, योजना अधिकृत मनोज कुमार यादव, वडा नं. १० का अध्यक्ष गंगाराम खंग, वडा नं. ३ का अध्यक्ष अनिल दास, वडा नं. ४ का अध्यक्ष दिनेश कसेरा, तथा के.ए. माविका प्रधानाध्यापक योगेन्द्र प्रसाद यादवले पुरस्कार तथा प्रमाणपत्र प्रदान गरेका थिए ।

कार्यक्रम उत्साहजनक वातावरणमा सम्पन्न भएको आयोजक पक्षले जनाएको छ ।