सप्तरीमा बसको ठक्करबाट वृद्धको मृत्यु, आक्रोशित स्थानीयद्वारा सडक अवरुद्ध

राजविराज । पूर्व-पश्चिम राजमार्ग अन्तर्गत सप्तरीको अग्नीसाईर कृष्णासवरन गाउँपालिका -२ चाँदनी चौकमा शनिबार बिहान बसको ठक्करबाट एक वृद्धको मृत्यु भएको छ ।

स्थानीय सितापुर निवासी ६८ वर्षीय बुदुर चौधरीको घटनास्थलमै मृत्यु भएको जिल्ला प्रहरी कार्यालय सप्तरीले जनाएको छ । पश्चिमबाट पूर्वतर्फ गइरहेको ना.प्र. १-०१-००१ ख ४५६० नम्बरको बसले सोही दिशामा साइकलमा सवार चौधरीलाई पछाडिबाट ठक्कर दिँदा उनको घटनास्थलमै मृत्यु भएको हो ।

घटनाको समयमा चौधरी बिहान ६ बजे धानखेततर्फ जाँदै थिए । ठक्कर दिने बस र चालक इलाका प्रहरी कार्यालय कंचनपुरको नियन्त्रणमा रहेका छन् भने घटनाबारे थप अनुसन्धान भइरहेको प्रहरीले जनाएको छ ।

घटनापछि आक्रोशित स्थानीय र मृतकका आफन्तले बिहानैदेखि सडक अवरुद्ध गरेका छन् । अवरोधका कारण सयौँ सवारी साधन सडकमा थन्किएका छन् र हजारौं यात्रु बीच बाटोमै अलपत्र परेका छन् ।

मृतकको शव पोस्टमार्टमका लागि गजेन्द्रनारायण सिंह अस्पताल, राजविराज पठाउने तयारी भइरहेको प्रहरीले जनाएको छ ।