भूषण सिहं 
राजविराज । लोकतन्त्रको चौथो स्तम्भ मानिने पत्रकार सुरक्षामा फेरि गम्भीर प्रश्न उठाउने घटना शुक्रबार बिहान राजविराजमा घट्यो । नयाँ पत्रिका दैनिकका सप्तरी संवाददाता सौरभ यादवमाथि गजेन्द्रनारायण सिंह अस्पतालको दक्षिणी गेटअगाडि बिहान ठीक १० : ४२ बजे चक्कु, बेल्ट र हेलमेट प्रयोग गरी संघातिक आक्रमण गरिएको हो ।
टाउको र शरीरका विभिन्न भागमा चोटपटक लागेका यादव हाल सोही अस्पतालमा उपचाररत छन् । ‘गेटअगाडि साथीहरूसँग सामान्य कुरा गरिरहेको थिएँ, तर छिन्नमस्ता गाउँपालिका–१, वीरपुरका कृष्णनाथ यादव उर्फ क्याप्टेन, राजविराज–११ का राजु यादव र विष्णुपुर गाउँपालिका–७ का राजबाबु झाले एक्कासी आक्रमण गरे,’ पीडित यादवले भने ।
घटना पत्रकारमाथि लक्षित योजनाबद्ध आक्रमणको संकेत गर्ने खालको भएको र यसले प्रेस स्वतन्त्रतामाथि गम्भीर चोट पुर्याएको छ । जिल्ला प्रहरी कार्यालय सप्तरीका डिएसपी जितेन्द्र बस्नेतका अनुसार घटनामा संलग्न तीनै जना फरार रहेका छन् र उनीहरूको खोजी तीव्र रूपमा भइरहेको जानकारी दिए ।
यसबीच, स्थानीय पत्रकार र नागरिक समाजले यसलाई प्रेसमाथिको सुनियोजित आक्रमण भन्दै तत्काल दोषी पक्राउ गरी कडा कारबाहीको माग गरेका छन् ।
हामी क्षमा चाहन्छौं यो पोस्ट धेरै पुरानो भएको ले कमेन्ट बक्स बन्द गरेको छौं |