मधेश प्रदेशको उत्कृष्ट व्यवस्थापक पुरस्कार विनोद साफीलाई

राजविराज । राजबिराजस्थित आइडियल बचत तथा ऋण सहकारी संस्था लि.का व्यवस्थापक विनोद कुमार साफी मधेश प्रदेशको उत्कृष्ट साकोस (बचत तथा ऋण सहकारी संस्था) व्यवस्थापकका रूपमा सम्मानित भएका छन् ।

शनिबार काठमाडौंमा आयोजित नेपाल बचत तथा ऋण सहकारी केन्द्रीय संघ (नेफ्स्कून) को ३८औं स्थापना दिवसको अवसरमा भूमि व्यवस्था, सहकारी तथा गरिबी निवारण मन्त्री बलराम अधिकारी र नेफ्स्कूनका अध्यक्ष चन्द्रप्रसाद ढकालले साफीलाई सम्मान गरेका हुन् ।

नेफ्स्कूनले मधेश प्रदेशकै उत्कृष्ट व्यवस्थापक घोषणा गर्दै साफीलाई पुरस्कार प्रदान गरेको हो । उनी सप्तरीका प्रमुख सहकारी संस्थामध्ये एक मानिने आइडियल बचत तथा ऋण सहकारी संस्थाका व्यवस्थापक हुन् ।

सहकारी क्षेत्रमा १८ वर्षको अनुभव बोकेका साफीले हाल १७ हजार ६८६ सदस्य रहेको आइडियल सहकारीको व्यवस्थापकीय नेतृत्व गरिरहेका छन् । संस्थाको कुल सम्पत्ति १ अर्ब ५० करोड रुपैयाँ रहेको छ ।