सुनसरीका जगदिश मेहता सप्तरीमा मृत फेला, मृत्यु शंकास्पद

राजविराज । सप्तरीको तिरहुत गाउँपालिका–४ डिमनमा आइतबार एक पुरुषको शंकास्पद मृत्यु भएको छ । सुनसरी दुहवी नगरपालिका–११, तन्मुनाका अन्दाजी ५० वर्षीय जगदिश मेहता झुन्डिएको अवस्थामा मृत फेला परेका हुन् ।

प्रहरीका अनुसार मेहता बस्दै आएको घर नजिकैको मुङ्गाको रुखको हाँगामा गम्छाको पासो लगाई घुँडाले भुइँ टेकेको अवस्थामा मृत फेला परेका थिए । उनी करिब ४–५ दिनअघि मात्रै डिमनस्थित रञ्जित कुमार मेहताले सञ्चालन गर्दै आएको शिवशक्ति होटलमा काम गर्न आएका थिए ।

घटनास्थलमा प्रहरी चौकी डिमनका प्रहरी टोलीले पुगेर क्षेत्रलाई सुरक्षित गरेको र थप अनुसन्धानका लागि इलाका प्रहरी कार्यालय कञ्चनपुरबाट प्रहरी निरीक्षकको कमान्डमा एसओसीओ प्राविधिकसहितको टोली खटिएको प्रहरीले जनाएको छ ।

मृतकको आफन्तहरूले घुँडाले भुइँ टेकेको अवस्थामा शव भेटिएको भन्दै घटनाप्रति शंका व्यक्त गरेका छन् । उनीहरूले मेहताको हत्या भएको हुन सक्ने दाबी गर्दै शव पोस्टमार्टममा पठाउन केही समय अवरोध समेत गरेका थिए ।

इलाका प्रहरी कार्यालय कञ्चनपुरका प्रमुख डिएसपी माधव प्रसाद काफ्लेले मेहता झुन्डिएको अवस्थामा मृत भेटिएको पुष्टि गर्दै भने, “शव परीक्षणपछि मात्र मृत्युको वास्तविक कारण थाहा हुन्छ ।”

हाल मृतकको शव पोष्टमार्टमका लागि धरानस्थित विपि कोइराला स्वास्थ्य विज्ञान प्रतिष्ठान पठाइएको र घटनाबारे थप अनुसन्धान भइरहेको प्रहरीले जनाएको छ ।