गौर काण्ड राजनीतिक मामिला, अनुसन्धानमा सहयोग गर्छु: उपेन्द्र यादव

राजविराज । जनता समाजवादी पार्टीका अध्यक्ष उपेन्द्र यादवले गौर काण्डलाई राजनीतिक मामिला भएको बताउँदै, अनुसन्धान भए उनी निष्पक्ष रूपमा सहयोग गर्ने बताएका छन् ।

अध्यक्ष यादवले अदालतलाई सम्मान गर्ने बताए भने, घटनाको समयमा सरकारले अनुसन्धान गरी तथ्य बाहिर ल्याइसकेको समेत स्मरण गरे। न्यायिक जाँचबुझ आयोग, मानव अधिकार आयोग र संयुक्त राष्ट्रसंघीय मानव अधिकार आयोगले समेत यस विषयमा प्रतिवेदन पेश गरिसकेको उनले बताए ।

उनले करिब १९ वर्षपछि मुद्दा पुनः अघि बढाउनु राजनीतिक प्रतिशोध हुन सक्ने बताए, र फैसलाको पूर्णपाठ नआइकन मुद्दाबारे हतारमा बोल्नु उपयुक्त नरहेको बताएका छन् । अध्यक्ष यादवले आफूहरू जनताको अधिकारका लागि लडेका व्यक्ति भएकाले डरिनुपर्ने वा आत्तिनुपर्ने आवश्यक नभएको पनि स्पष्ट पारे ।

यादवले बताए अनुसार, यस विषयलाई राजनीतिक रूपमा समाधान गर्न राजनीतिक शक्तिहरूले पहल गर्नु पर्नेछ । गौर नरसंहारमा मारिएका व्यक्तिहरूका परिवार र घाइतेहरूले पनि जिल्ला प्रहरी कार्यालय, रौतहटमा जाहेरी दिएको भए पनि छानबिन नबढेको भन्दै अनुसन्धान अघि बढाउन माग गर्दै आएका थिए ।

सर्वोच्च अदालतले मुद्दामा विपक्षी बनाइएकाहरूमाथि अनुसन्धान अघि बढाउन प्रहरी मुख्यालय र गृह मन्त्रालयलाई आदेश दिएको छ । २०६३ साल चैत्र ७ गते रौतहटको गौरस्थित राईसमिलको चौरमा मधेसी जनअधिकार फोरम र माओवादीको एकै ठाउँमा भएको झडपमा २७ माओवादी कार्यकर्ता मारिएका र सयभन्दा बढी घाइते भएका थिए ।