लालु मृत्यु प्रकरणमा निष्पक्ष छानबिन गर्न सांसद दिनेश यादवको दबाब

राजविराज । संघीय सांसद दिनेश यादवले सप्तरीको राजगढ गाउँपालिका- २ कमलपुरमा प्रहरीको गोली लागेर मृत्यु भएका लालु यादवको घटनामा उच्चस्तरीय न्यायिक छानबिन गर्न सरकारसमक्ष माग गरेका छन् ।

आइतबार नेपाली कांग्रेस सप्तरी कार्यसमितिद्वारा आयोजित बैठकमा बोल्दै सांसद यादवले मृतकको परिवारलाई उचित राहत उपलब्ध गराउनुपर्नेमा जोड दिए । उनले भने, “लालु यादवको घटनाको घोर भर्त्सना गर्दछु । राज्यबाट यसको उच्चस्तरीय न्यायिक छानबिन हुनुपर्छ र दोषीमाथि कडा कारबाही गर्नुपर्छ ।”

सांसद यादवले छानबिनमा ढिलाइ भए सडक संघर्षमार्फत् दबाब सिर्जना गर्ने चेतावनीसमेत दिएका छन् । उनका अनुसार प्रधानमन्त्री, गृहमन्त्री, प्रहरी महानिरीक्षकदेखि प्रदेशका डिआईजीसम्मले घटनाको छानबिन गर्न उच्चस्तरीय समिति बनाउने प्रतिबद्धता जनाइसकेका छन् ।

तर छानबिन समितिलाई प्रहरीकै वरिष्ठ अधिकारीको नेतृत्वमा गठन गर्ने तयारी भएको भन्दै उनले आपत्ति जनाए । यादवले भने, “प्रहरीको छानबिन प्रहरीकै नेतृत्वमा हुँदा निष्पक्षता सुनिश्चित हुँदैन । यसका लागि नागरिक समाज वा अन्य स्वतन्त्र निकायको नेतृत्वमा मात्र विश्वासिलो छानबिन सम्भव हुन्छ ।”

यसअघि आक्रोशित स्थानीयबासी, मृतकका आफन्त र राजनीतिक दलहरूले संयुक्त संघर्ष समिति गठन गरी राजविराजमा चरणबद्ध आन्दोलन गरेका थिए । संघर्ष समितिका संयोजक दिपेन्द्र यादवका अनुसार सहमति भए पनि न्याय सुनिश्चित नभएसम्म आन्दोलन रोकिँदैन ।

गत साउन २० गते राति राजगढ गाउँपालिका- २ कमलपुरमा प्रहरीले गोली चलाउँदा स्थानीय लालु यादवको घटनास्थलमै मृत्यु भएको थियो ।