राजबिराजमा शिक्षक महासंघद्वारा शिक्षा विधेयकविरुद्ध धर्ना

राजविराज । शिक्षा विधेयकप्रति असन्तुष्टि जनाउँदै नेपाल शिक्षक महासंघ आन्दोलित भएको छ । शुक्रबार शिक्षक आन्दोलन परिचालन संघर्ष समितिले राजविराज नगरपालिकामा दुई घण्टे धर्ना दिएर प्रमुख प्रशासकीय अधिकृत हरिकिशोर चन्द्रवंशीलाई ज्ञापनपत्र बुझाएको हो ।

ज्ञापनपत्रमा सहमति भएका विषयहरू विधेयकमा सम्बोधन नभएको भन्दै छुटिएका बुँदाहरू समावेश गर्नुपर्ने माग गरिएको छ । “अस्थायी प्रकृतिका शिक्षकको स्थायित्वका लागि तोकिएको आन्तरिक परीक्षामा शतप्रतिशत सहमति हुनुपर्छ, गोल्डेन ह्यान्डसेक अन्तर्गत दिइने रकम तोक्नुपर्छ, बालशिक्षकलाई पद र सेवा–सुविधा दिनुपर्छ, विद्यालय कर्मचारीहरूको दरबन्दी कायम गर्नुपर्छ, प्रधानाध्यापकलाई ट्रेड युनियन अधिकार दिनुपर्छ, आवधिक बढुवा सुनिश्चित गर्नुपर्छ, शिक्षक सेवा आयोगमा योग्य उम्मेदवारको उमेर सीमा ४० वर्ष हुनुपर्छ,” शिक्षिका चित्रलेखा देवले बताइन् ।

यस्तै, राहत शिक्षक मधेश प्रदेश अध्यक्ष गंगाप्रसाद यादवले लामो रस्साकस्सी र विवादबीच विद्यालय शिक्षा विधेयक संसदीय समिति हुँदै प्रतिनिधि सभामा पुगे पनि महत्वपूर्ण विषयहरू छुटेको बताए ।

संसद्मा विधेयक पेस भएको दिनमै नेपाल शिक्षक महासंघले असन्तुष्टि जनाउँदै आन्दोलनका कार्यक्रम घोषणा गरेको थियो। महासंघले सरकार र शिक्षकबीच भएको पूर्वसहमति विपरीत विधेयक आएको भन्दै आन्दोलन अपरिहार्य भएको बताएको छ ।

धर्ना कार्यक्रममा आन्दोलन परिचालन समितिका अध्यक्ष निरज सिंह, सचिव भोगेन्द्र झा, शिक्षिका बिभा झा, भोलाप्रसाद साह, उपेन्द्र यादव, सतिशचन्द्र झा, वैधनाथ यादव, गीता यादव, पुनम मण्डललगायत शिक्षक–शिक्षिकाको सहभागिता थियो ।