ठक्कर दिने सवारी फरार, पीडित अस्पतालमै बन्धकझैँ, सहयोगका लागि परिवारको आग्रह

राजविराज । नम्बर नखुलेको सवारीसाधनको ठक्करबाट गम्भीर घाइते भएका सप्तरीका एक व्यक्तिको उपचार आर्थिक अभावका कारण रोकिएको छ । राजविराज नगरपालिका–७ निवासी ५४ वर्षीय अनिरुद्धलाल देवलाई आवश्यक खर्च जुटाउन नसक्दा समस्या उत्पन्न भएको परिवारले जनाएको छ ।

करिब एक महिनाअघि तिलाठी कोइलाडी गाउँपालिका–५ सडेपार नजिक पैदल हिँडिरहेका देवलाई नम्बर खुल्न नसकेको मोटरसाइकलले ठक्कर दिएको थियो । दुर्घटनापछि सवारी चालक फरार भएको थियो ।

गम्भीर चोट, विशेषगरी टाउकोमा गहिरो चोट लागेकाले उनलाई विराटनगरस्थित गोल्डेन अस्पतालमा भर्ना गरिएको थियो । टाउकोको शल्यक्रिया सहित हालसम्म करिब ५ लाख रुपैयाँ खर्च भइसकेको छ। तर अस्पताल तथा औषधि बिल गरेर अझै करिब ५ लाख रुपैयाँ तिर्न बाँकी रहेको घाइतेका छोरा रामभजन देवले बताए ।

शल्यक्रियापछि देवको स्वास्थ्यमा केही सुधार देखिए पनि वक्यौता रकम नतिरेकाले अस्पतालबाट डिस्चार्ज हुन नसकेको परिवारले जनाएको छ ।

आर्थिक अवस्था कमजोर भएकाले उपचारमा सहयोग गरिदिन उहाँका छोराले सबैसँग आग्रह गरेका छन् । सहयोगका लागि ग्लोबल आइएमई बैंकको खाता नम्बर ००१०७०१००५२४९६ मा सहयोग गर्न सकिने परिवारले जनाएको छ ।