पूर्वसिँचाइ मन्त्री उमेश यादव नेकपा त्याग्दै जसपा नेपालमा प्रवेश

राजबिराज । पूर्वसिँचाइ मन्त्री तथा नेपाल कम्युनिस्ट पार्टी (नेकपा) का नेता उमेश प्रसाद यादव जनता समाजवादी पार्टी (जसपा) नेपालमा प्रवेश गरेका छन् ।

मंगलबार ललितपुरस्थित बालकुमारीमा रहेको जसपा नेपालको केन्द्रीय कार्यालयमा आयोजित कार्यक्रममा पार्टी अध्यक्ष उपेन्द्र यादवले खादा ओढाएर उनलाई औपचारिक रूपमा स्वागत गरे ।

सप्तरी निवासी यादव लामो समयदेखि वामपन्थी राजनीतिमा सक्रिय रहँदै आएका छन् । पार्टी प्रवेशका क्रममा उनले वर्तमान राजनीतिक परिस्थितिमा संघीयताको प्रभावकारी कार्यान्वयन, मधेशको अधिकार, पहिचान र सामाजिक न्यायका सवालमा जसपा नेपालको एजेन्डा स्पष्ट तथा जनमुखी रहेकाले आफू यस पार्टीमा आबद्ध भएको बताए ।

उनले जसपाको नेतृत्वमा मात्र शोषित, उत्पीडित तथा सीमान्तकृत समुदायका अधिकार सुनिश्चित हुन सक्ने विश्वास व्यक्त गरे ।

यस अवसरमा जसपा नेपालका अध्यक्ष उपेन्द्र यादवले अनुभवी नेता यादवको आगमनले पार्टी संगठन सुदृढ हुने र मधेश आन्दोलन तथा समावेशी लोकतन्त्रको संघर्ष अझ सशक्त बन्ने उल्लेख गरे । उनले यादवको सक्रिय भूमिकाले पार्टीलाई राष्ट्रिय राजनीतिमा थप प्रभावकारी बनाउन महत्वपूर्ण योगदान पुग्ने विश्वास व्यक्त गरे ।

उमेश यादव तत्कालीन जनयुद्धकालदेखि नै राजनीतिमा सक्रिय रहँदै आएका नेता हुन् । उनले माओवादी आन्दोलनका क्रममा सेल कमिटीदेखि केन्द्रीय सदस्यसम्म विभिन्न जिम्मेवारी सम्हालेका थिए । साथै मधेशी राष्ट्रिय मुक्ति मोर्चाको सप्तरी संयोजक, जिल्ला जनसरकार प्रमुख तथा जनमुक्ति सेनाको बटालियन कमिसारको रूपमा समेत कार्य गरिसकेका छन् ।