सप्तरीमा ट्रकले किच्दा एक व्यक्तिको मृत्यु

राजविराज । सप्तरीको खडक नगरपालिका वडा -५ स्थित पूर्व पश्चिम राजमार्गमा शुक्रबार बिहान ट्रकले किच्दा एक व्यक्तिको ज्यान गएको छ ।

ना. ८ ख २८१६ नम्बरको मालबाहक ट्रकले किच्दा खड्क नपा ५ खरचुहिया बस्ने ६० वर्षका माखन साहको मृत्यु भएको प्रहरीले जनाएको छ । पश्चिमबाट पूर्वतर्फ जादै गरेको ट्रकले विपरीत दिशातर्फ साइकलमा आउँदै गरेका साहलाई किचेको हो ।

ट्रक चालक प्युठानको छिन्ताङ बस्ने बमबहादुर पुनलाई नियन्त्रणमा लिइ मृतकको शवलाई पोस्टमार्टमका लागि गजेन्द्रनारायण सिंह अस्पताल राजविराज पठाइएको प्रहरीले जनाएको छ ।