चन्दन यादब 
सर्लाही । सर्लाही जिल्लाको हरिपुर्वा नगरपालिका–६ मा शुक्रबार साँझ भएको गोली प्रहारमा एक पूर्व शिक्षकको ज्यान गएको छ । मोटरसाइकलमा आएका दुई अज्ञात व्यक्तिले स्थानीय ४५ वर्षीय रामपुकार राय यादवको टाउकोमा गोली हानेपछि उनको घटनास्थल नजिकै मृत्यु भएको हो ।
प्रहरीका अनुसार साँझको करिब ७ बजे यादव आफ्नो घरको आँगनमा छरछिमेकीसँग गफ गरिरहेका बेला मोटरसाइकलमा आएका दुई युवाले “रामपुकार भनेको को हो?” भनी सोधपुछ गरेपछि नजिकैबाट गोली प्रहार गरेका थिए ।
गम्भीर घाइते यादवलाई तत्कालै उपचारका लागि महोत्तरीको सोनामा गाउँपालिका पर्सास्थित स्वास्थ्य संस्थामा पुर्याइए पनि चिकित्सकहरूले मृत घोषित गरेका थिए ।
गोली प्रहारपछि भाग्ने क्रममा आक्रमणकारीहरूको मोटरसाइकल हरिपुर्वा–६ को वसन्तपुर क्षेत्रमा दुर्घटनामा परेको प्रहरीले जनाएको छ । दुर्घटनामा एक जना घाइते भएको र उनलाई प्रहरीले नियन्त्रणमा लिएर उपचारका लागि जनकपुरस्थित अस्पताल भर्ना गरेको छ । अर्का आक्रमणकारी भने फरार छन् ।
सर्लाही जिल्ला प्रहरी कार्यालयका प्रवक्ता डिएसपी सरोज राईका अनुसार घटनामा संलग्नहरूको पहिचान भइसकेको छ । “फरार व्यक्तिको खोजी तीव्र रूपमा भइरहेको छ, अनुसन्धानको प्रारम्भिक चरणमा भएकाले घाइतेको नाम सार्वजनिक गर्न सकिएको छैन,” डिएसपी राईले बताए ।
मृतक यादव सर्लाही सदरमुकाम मलङ्गवास्थित एक निजी विद्यालयमा शिक्षकका रूपमा कार्यरत थिए । पछिल्लो समय उनी खेतीपातीसँगै गाउँमा ऋण लगानीसमेत गर्ने गरेको स्थानीयले बताएका छन् । त्यसैले व्यक्तिगत रिसीइबी वा आर्थिक लेनदेन नै आक्रमणको कारण हुनसक्ने अनुमान गरिएको छ ।
तर, प्रहरीले घटनाको पछाडिको कारणबारे आधिकारिक रूपमा केही खुलाएको छैन । घटनास्थलबाट प्रमाण सङ्कलन भइरहेको र थप अनुसन्धानपछि विवरण सार्वजनिक गरिने प्रहरीको भनाइ छ ।
दिनदहाडै भएको गोली प्रहारले हरिपुर्वा र आसपासका बस्तीमा त्रास फैलिएको छ । “गाउँमै हाँसखेल गर्दै बसिरहनु भएको बेला मोटरसाइकलमा आएका दुई जनाले सोधपुछ गरेरै गोली हाने, यस्तो घटना हाम्रो गाउँमा पहिलो पटक भएको हो,” एक प्रत्यक्षदर्शीले भने ।
स्थानीयवासीले हालै सर्लाहीमा आपराधिक गतिविधि बढेको गुनासो गर्दै प्रहरी प्रशासनले शान्ति–सुरक्षा बलियो बनाउन तत्काल कडा कदम चाल्नुपर्ने माग गरेका छन् ।
प्रहरीले फरार आक्रमणकारीलाई चाँडै पक्राउ गर्ने र घटनाको कारणबारे स्पष्ट विवरण सार्वजनिक गर्ने प्रतिबद्धता जनाएको छ ।
हामी क्षमा चाहन्छौं यो पोस्ट धेरै पुरानो भएको ले कमेन्ट बक्स बन्द गरेको छौं |