महिला क्रिकेट सिरिज: पहिलो खेलमा काठमाडौँ ११ विजयी

राजविराज । सप्तरी क्रिकेट संघको आयोजनामा काठमाडौँ ११ महिला क्रिकेट टोली र सप्तरी महिला क्रिकेट टोलीबीच भएको मैत्रीपूर्ण तीनदिवसीय क्रिकेट प्रतियोगिताको पहिलो खेलमा काठमाडौँ ११ विजयी भएको छ ।

आइतबार राजविराजस्थित पविमावि खेलमैदानमा सम्पन्न खेलमा काठमाडौँ ११ ले सप्तरी ११ लाई १६३ रनको फराकिलो अन्तरले पराजित गरेको हो । यससँगै तीन खेलको सिरिजमा काठमाडौँ ११ ले १–० को अग्रता लिएको छ ।

टस जितेर सप्तरी ११ ले काठमाडौँ ११ लाई ब्याटिङको निम्तो दिएको थियो । काठमाडौँ ११ ले निर्धारित ३० ओभरको खेलमा २८ ओभर २ बलमा सबै विकेट गुमाउँदै २०५ रनको योगफल बनाएको थियो ।

काठमाडौँका लागि साबिका यादवले उत्कृष्ट अर्धशतकीय पारी खेल्दै ५६ रन बनाइन्। त्यसैगरी यशु पाण्डेले ४७ रन, अलिसा खड्काले २२, अनुषा रोकाले १३ र अंशु मण्डलले ११ रन जोडिन् ।

बलिङतर्फ सप्तरीकी सुस्मिता यादवले उत्कृष्ट प्रदर्शन गर्दै ६ ओभरमा २९ रन खर्चेर ५ विकेट लिइन्। यसैगरी साक्षी यादवले २ विकेट लिँदा सचिता यादव र अपेक्षा यादवले समान १–१ विकेट हात पारे ।

२०६ रनको लक्ष्य पछ्याउने क्रममा सप्तरी ११ ले १२ ओभर ५ बलमै सबै विकेट गुमाउँदै मात्र ४२ रन बनाउन सक्यो। सप्तरीका लागि बन्दना रजकले ११ रन बनाउनु बाहेक अन्य कुनै पनि ब्याटरले दोहोरो अंकमा रन जोड्न सकेनन् ।

काठमाडौँ ११ का बलरहरूको घातक बलिङका कारण सप्तरीका ब्याटरहरू दबाबमा परे। अनुषा रोकाले उत्कृष्ट बलिङ गर्दै ४ विकेट लिइन् भने पूजा साउदले २ विकेट हात पारिन् । यसैगरी यशु पाण्डे, अंशु मण्डल र आयुष्मा रावलले समान १–१ विकेट लिएका थिए । खेलको ‘प्लेयर अफ द म्याच’ काठमाडौँ ११ की साबिका यादव घोषित भइन् ।

खेल अवलोकनका लागि सप्तरी क्रिकेट संघका उपाध्यक्ष निरज सिंह, सचिव चन्दनकुमार यादव, सदस्यहरू संजय कार्की, रोशन मण्डल, शम्भु दास, बिरेन्द्र यादव, छनोट समिति सदस्य धर्मेन्द्र चौधरी, राहुल सिंह, गजेन्द्र माझी, सबल नेपालका कार्यक्रम संयोजक नवनित जैयशवाल, अम्पायर सन्तोष देव लगायतको उपस्थिति रहेको थियो ।