हजारौँ भक्तको सहभागितामा राजविराजमा जगन्नाथ रथयात्रा नगर परिक्रमा

राजविराज । विगत केही वर्षदेखि निरन्तर रूपमा राजविराजमा मनाइँदै आएको जगन्नाथ रथयात्रा यस वर्ष पनि भव्य रूपमा सम्पन्न भएको छ । शनिबार निकालिएको रथयात्रा नगरका विभिन्न स्थान परिक्रमा गर्दै अघि बढेको थियो ।

रथयात्राको क्रममा राजविराज नगरपालिका वडा नं. २ अन्तर्गत कञ्चनपुर सडकस्थित गुलाब ग्यारेज अगाडि रहेको महावीर चोकमा स्थानीयवासीहरूले रथयात्रीहरूलाई माला लगाएर स्वागत गरेका थिए । साथै सहभागीहरूका लागि पानी तथा चियाको व्यवस्था गरिएको जानकारी गोकुल साहले दिए ।

युवा–युवती, वृद्ध–वृद्धा तथा बालबालिकाको उल्लेखनीय सहभागितामा ‘हरे राम, हरे कृष्ण, कृष्ण कृष्ण हरे हरे’ भजनको धुनमा नाचगान गर्दै नगर परिक्रमा गरिएको थियो ।

श्री लक्ष्मीनारायण राधाकृष्ण मन्दिरको प्राङ्गणबाट सुरु भएको कलश यात्रा नगर परिक्रमा पश्चात पुनः सोही स्थानमा पुगेर सम्पन्न भएको हो ।

श्री लक्ष्मीनारायण राधाकृष्ण मन्दिर, राजविराजको समन्वयमा श्रीकृष्ण भक्त मण्डल तथा इस्कान राजविराजको संयुक्त आयोजनामा पुष १८ गतेदेखि पुष २५ गतेसम्म श्रीमद्भागवत कथा सप्ताह ज्ञान महायज्ञ तथा पुष २६ गते जगन्नाथ रथयात्रासहित विभिन्न धार्मिक कार्यक्रम आयोजना गरी महोत्सव मनाइएको थियो ।

सप्ताहव्यापी महोत्सवअन्तर्गत पुष १८ देखि पुष २५ गतेसम्म भारतको मथुराबाट आएका प्रख्यात कथावाचक रामानुज दासद्वारा कथा वाचन कार्यक्रम सञ्चालन गरिएको थियो ।

यस्ता धार्मिक आयोजनाले धर्मप्रतिको आस्था अभिवृद्धि गर्नुका साथै आपसी सद्भाव बढाउने र समाजमा देखिएका विकृति तथा विसङ्गति न्यूनिकरण गर्न सहयोग पुग्ने विश्वास आयोजकहरूले व्यक्त गरेका छन् ।