कञ्चनरुपमा करेन्ट लागेर दम्पतीको मृत्यु, गाउँभरि शोक र आक्रोश

राजविराज । कञ्चनरुप नगरपालिका–५ पिपरामा गए राति करिब १०:३० बजे करेन्ट लागेर ५० वर्षीय बद्रि सरदार र उनकी ४५ वर्षीया पत्नी विमला देवी सरदारको मृत्यु भएको छ ।

स्थानीय स्रोतका अनुसार दम्पती आफ्नो खेततर्फ फर्कँदै गर्दा खेतमा राखिएको तारमा करेन्ट लागेर घटनास्थलमै ढलेका थिए। उक्त तारमा करेन्ट जोडिएको थियो र यसलाई स्थानीय महेन्द्र सरदारले हात्तीबाट धानबाली बचाउन प्रयोग गरेका थिए ।

घटनापछि गाउँभरि शोक र आक्रोश छाएको छ । स्थानीयवासीहरूले खेतबाली जोगाउन करेन्ट प्रयोग गर्ने प्रचलन तुरुन्त रोक्न माग गरेका छन् ।

प्रहरी टोलीले घटनास्थलको अनुसन्धान गर्दै कानुनी प्रक्रिया अघि बढाएको छ ।