सप्तरी–२ मा नेकपाबाट इन्जिनियर गजेन्द्र यादवको दावेदारी

राजबिराज । नेपाली कम्युनिस्ट पार्टी (नेकपा) का तर्फबाट सप्तरी निर्वाचन क्षेत्र नं. २ मा अखिल (क्रान्तिकारी) का उपमहासचिव तथा इन्जिनियर गजेन्द्र यादवले आफ्नो उम्मेदवारीको दावेदारी प्रस्तुत गरेका छन् ।

यसअघि नेकपाबाट सिफारिस गरिएका प्रस्तावित उम्मेदवार तथा पूर्वमन्त्री उमेश यादवले पार्टी परित्याग गरेपछि, युवाहरूका आशाका केन्द्रका रूपमा इन्जिनियर यादवको दावेदारी चर्चामा आएको हो । हाल उनी अखिल (क्रान्तिकारी) मधेश प्रदेश इन्चार्जको जिम्मेवारीमा सक्रिय छन् ।

२०७९ सालमा सम्पन्न प्रतिनिधिसभा निर्वाचनमा यही क्षेत्रबाट जनमत पार्टीका अध्यक्ष सिके राउतले जनता समाजवादी पार्टी (जसपा) का अध्यक्ष उपेन्द्र यादवलाई पराजित गरेका थिए । त्यस कारण पनि यो निर्वाचन क्षेत्रलाई राजनीतिक दृष्टिले अत्यन्त महत्वपूर्ण मानिँदै आएको छ ।

त्यसैगरी, २०७० सालको संविधानसभा निर्वाचनमा तत्कालीन माओवादी केन्द्रका उम्मेदवारले यस क्षेत्रमा विजय हासिल गरेका कारण ऐतिहासिक रूपमा पनि यो क्षेत्र नेकपाको बलियो आधार क्षेत्रका रूपमा हेरिँदै आएको छ भन्ने विश्लेषण गरिन्छ ।